अखबार नेपाल ट्रेन्डिङ

काठमाडौं: नेकपा अध्यक्ष पुष्पकमल दाहाल प्रचण्डविरुद्धको अवहेलना मुद्दा आज पेशी तोकिए पनि सुनुवाइ हुन सकेन ।

सर्वोच्च अदालतमा दर्ता गरिएको अवहेलना मुद्दा न्यायाधीश डा. मनोजकुमार शर्माको एकल इजलासमा पेशी तोकिए पनि उक्त इजलासको बेन्च नै बस्न नभ्याएपछि पेशी सरेको हो ।

सोमबार प्रचण्डविरुद्ध समिर हायूले अदालतको अवहेलना मुद्दा दर्ता गरेका थिए ।

यसअघि प्रधानमन्त्री केपी ओलीसहित पूर्वसभामुख दमननाथ ढुंगाना, पूर्व प्रधानन्यायाधीशहरु मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीविरुद्धको रिट निवेदनको सुनुवाइ पनि शर्माकै इजलासमा भएको थियो ।

माघ १५ गते उनीहरु सबैसँग अदालतले सात दिनभित्रमा लिखित जवाफ माग गरेको छ ।

संसद् विघटनविरुद्ध सर्वोच्चमा सुनुवाइ भइरहेका बेला प्रचण्डले दिएको अभिव्यक्तिले अदालतको अवहेलना गरेको हायूको रिट निवेदनमा उल्लेख छ ।