अखबार नेपाल ट्रेन्डिङ

चितवन : राष्ट्रिय प्रजातन्त्र पार्टीको अध्यक्ष कमल थापाले देशभित्र मुठभेडतर्फ जानसक्ने भन्दै चिन्ता व्यक्त गरेका छन् । नेपाल कम्युनिष्ट पार्टी(नेकपा)ले शक्ति प्रदर्शनका नाममा देशलाई मुठभेडतर्फ धकेलेको उनको कथन रहेको छ ।
राष्ट्रिय प्रजातन्त्र पार्टी चितवनले आइतबार आयोजना गरेको एक कार्यक्रममा बोल्दै थापाले नेकपाकै कारण देशमा अस्थिरता र अराजतकता सिर्जना हुने खतरा बढेको पनि बताए ।

थापाले अराजकता बढ्दै जाँदा राष्ट्रियतामाथि नै खतरा बढ्ने कुरालाई औल्याउदै आफ्नो स्वार्थका लागि शक्ति प्रदर्शन गर्ने नाममा अदालतलाई प्रभावित पार्ने काम गर्दा संविधान नै धरापमा पर्न सक्ने बताए ।
त्यस्तै देशलाई संकटबाट मुक्त गर्न आफ्नो पार्टीले जिम्मेवारीपूर्वक भूमिका निर्वाह गर्नुपर्ने आवश्यकता रहेको उनले बताए।

कार्यक्रममा बोल्दै थापाले संविधान र सर्वोच्च अदालतलाई नधम्काउन दलहरुलाई आग्रह गरे। ‘संविधानले नै संवैधानिक विवादको निराकरण गर्ने जिम्मा सर्वोच्च अदालतलाई दिएको जनाउदै थापाले ‘संविधान निर्माणमा भूमिका खेलेको भनिएकाहरुले नै सर्वोच्चलाई धम्काउने, तर्साउने लगायतका गतिविधि अशोभनीय भएको टिप्पणी गरे ।