अखबार नेपाल ट्रेन्डिङ

रामेछापः रामेछाप जिल्लाको दोरम्वा गाउँपालिका-१ डडुवामा रहेको मिल्तीलघु जलविद्युत आयोजना विगत एक वर्ष देखि बन्द भएको छ ।

रामेछाप र दोलखा जिल्लाको सिमानामा पर्ने डडुवाको मिल्ती खोलामा निर्माण भएको १६ किलोवाट क्षमताको लघु जलविद्युत आयोजना मर्मत हुन नसक्दा बन्द भएको हो ।

रकम अभावको कारण ११ बर्षदेखि सञ्चालनमा रहेको उक्त जलविद्युत आयोजना विगत १ बर्ष देखि बन्द भएको उक्त जलविद्युत आयोजनाका सचिव तारा बहादुर मोक्तानले बताए । दोरम्वा गाउँपालिकावडा–१ डडुवा मेघ्रेका १ सय ५० घरधुरीले उक्त विद्युत उपयोग गर्दै आएका थिए ।

२०६५ सालमा उक्त योजना निर्माणका लागि डडुवाका प्रत्येक घरले २-२ हजारका दरले रकम समेत उठाएका थिए । वैकल्पिक उर्जा प्रालिबाट २४ लाख रुपैया, तत्कालीन डडुवा गाविसको कार्यालयबाट प्राप्त ४ लाख पैसाबाट पनि आयोजना सम्पन्न नभएपछि स्थानीयहरुले अपुग रकम लघुवित्त विकास संस्थानबाट २४ लाख रुपैयाँ ऋण लिएर २०६५ सालमा विजुली बत्ती बालेको सचिव मोक्तानले बताए ।

स्थानीय उपभोक्ताहरुले मासिक १ सयका दरले शुल्क उठाएर विजुली बत्ती बालेको भएपनि उक्त उठाएको रकमले विद्युत स्टेशनमा बस्ने कर्मचारीलाई तलब खुवाउन मात्रै पुग्ने र अन्य मर्मत सम्भारको लागि रकम अभाव हुँदा उक्त आयोजना पूर्ण रुपमा बन्द हुन पुगेको गाउँलेहरु बताउँछन् ।

अघिल्लो बर्षको वर्षा याममा मिल्ति खोलामा आएको बाढीले कुलो बगाउनुका साथै विद्युत उत्पादनका लागि प्रयोग भएको ट्रमिनल मेसिनमा समेत क्षती गरे पछि विद्युत आयोजना बन्द भएको छ । अहिले यहाँ प्रयोग भएका सामानहरु समेत पुरानो हुँदै जान थालेपछि मर्मत गर्ने श्रोत साधनको अभावमा विद्युत उत्पादन बन्द भएको छ । अहिले उक्त आयोजनामा प्रयोग भएका सामाग्रीहरु खिया लागेर कामै नलाग्ने अवस्थामा पुगेका छन् ।