अखबार नेपाल ट्रेन्डिङ

एजेन्सीः जर्मन सुपर कप फुटबलको उपाधि बायर्न म्युनिखले जितेको छ ।

बुधबार राति भएको फाइनल खेलमा बोरुसिया डर्टमण्डलाई ३-२ गोल अन्तरले पराजित गर्दै बायर्नले उपाधि हात पारेको हो ।

बायर्नको जितमा कोरेन्टिन टोलिसो, थोमस मुलर र जोसुवा किमिचले एक एक गोल गरे ।

डर्टमण्डका जुलियन ब्रान्ड र एर्लिङ हालान्डले एक एक गोल फर्काए ।

खेलको १८ औं मिनेटमा टोलिसोको गोलबाट बायर्नले अग्रता लिएको थियो । खेलको ३२ औं मिनेटमा मुलरले गोल गर्दै बायर्नको अग्रता दोब्बर पारे ।

खेलको ३९ औं मिनेटमा डर्टमण्डका ब्रान्डले गोल गर्दै खेललाई २-१ को अवस्थामा ल्याए ।

५५ औं मिनेटमा हालान्डले गोल गर्दै डर्टमण्डलाई २-२ गोलको बराबरीमा ल्याए ।

खेलको ८२ औं मिनेटमा किमिचले गोल गर्दै बायर्नलाई ३-२ जित दिलाए ।

बायर्नको यो सिजनको दोस्रो उपाधि हो ।

यसअघि बायर्नले दुई साताअघि स्पेनिस क्लब सेभियालाई पराजित गर्दै युइएफए सुपर कपको उपाधि जितेको थियो ।