अखबार नेपाल ट्रेन्डिङ

काठमाडौं: नेपालमा कोरोना भाइरस संक्रमितको संख्या दिनप्रतिदिन बढिरहँदा पीसीआर टेष्टको नाममा केही निजी अस्पतालले भने महंगो शुल्क लिएर आम नागरिकमाथि लुट मच्चाएका छन् ।

केहीदिन अघि सरकारले पीसीआर टेस्ट गर्दा लाग्ने शुल्क घटाएको स्वास्थ्य तथा जनसंख्या मन्त्रालयले जनाएको थियो । सरकारी र निजी सबै ल्याबमा २ हजार रुपैयाँमा पीसीआर टेष्ट हुने बताईरहँदा निजी अस्पताल सौर्य हेल्थ केयर र स्टार हस्पिटलले भने यसको वेवस्ता गर्दै सरकारले निर्धारण गरेको शुल्क भन्दा दोब्बर मुल्यमा पीसीआर टेष्ट गरिएको पाईएको छ ।

विश्व बजारमा पिसिआर परीक्षण गर्न चाहिने आवश्यक किटको मूल्य घटेको र विश्व बजारमै यसको शुल्क पुनारावलोकन गरिएकाले नेपालमा पनि शुल्क घटाइएको मन्त्रालयले जनाएको छ । सुरुमा पीसीआर टेष्टको शुल्क ५५०० तोकिएको थियो । पछिल्लो समय त्यसलाई घटाएर ४ हजार रुपैयाँ बनाइएको थियो ।

हाल अन्तर्राष्ट्रिय बजारमा पीसीआर टेस्ट किटको मूल्य ८ सय रुपैयाँमा झरेको स्वास्थ्य मन्त्रालयले बताएको छ । यसरी सरकारले तोकेको मुल्यभन्दा चर्को मुल्यमा आम नागरिकलाई पीसीआर टेष्ट गराउँदै निजी अस्पतालहरुले आम नागरिकमाथि लुट मच्चाएका छन् । यसका लागि बेलैमा सम्बन्धित निकायले यसको छानविन गरी नियन्त्रणमा लिन आवश्यक देखिएको छ ।