अखबार नेपाल ट्रेन्डिङ

काठमाडौ: रुकुमपश्चिमको सोती घटनाका मृतकका परिवारलाई राष्ट्रिय कलाकार समुहको समन्वयमा पाँच लाख रुपैयाँ हस्तान्तरण गरिएको छ ।

बुधबार रिपोर्टर्स क्लब नेपालमा आयोजित पत्रकार सम्मेलनमा वरिष्ठ हाँस्यकलाकार मदनकृष्ण श्रेष्ठले जाजरकोटको भेरी नगरपालिकाका प्रमुख सीपी घर्तीलाई उक्त सहयोग रकम हस्तान्तरण गर्नु भएको छ ।

सहयोग रकम मृत्तकका प्रत्येक परिवारलाई पचास हजारका दरले रु तीन लाख, प्रत्येक घाईतेलाई दश हजारको दरले १२ जनालाई १ लाख २० हजार, कानूनी प्रक्रियाका लागि ८० हजार गरि जम्मा ५ लाख रकम नगरपालिकाका मेयर घर्तीमार्फत पीडितहरुलाई हस्तान्तरण गरिएको हो ।

कार्यक्रमका प्रमुख अतिथी वरिष्ठ कलाकार मदनकृष्ण श्रेष्ठले रुकुममा घटेको उक्त घटनाले आफु स्तब्ध भएको बताउँदै दलित शब्द शब्दकोषबाट हटाउनुपर्नेमा जोड दिनु भएको छ ।

कार्यक्रममा रिपोर्टर्स क्लब नेपालका सभापति ऋषि धमलाले पनि सोती घटनाका पीडितको सहयोगका लागि १० हजार रुपैयाँ हस्तान्तरण गर्दै देशबाट जातीय विभेद अन्त्य गर्नुपर्ने र त्यसका लागि आफूले सधै आवाज उठाइरहने बताउनु भएको छ ।