अखबार नेपाल ट्रेन्डिङ

एजेन्सीः ईटालियन सिरी ए मा नापोलीले हेल्लास भेरोनामाथि २–० को जित निकालेको छ । भेरोनाको घरेलु मैदान स्टाडियो मार्क एन्टोनियो बेन्टेगोडीमा भएको खेलमा नापोली २–० ले विजयी भएको हो । भेरोनाले खेलका २३औं र २४औं मिनेटमा पाएको गोलको सुन्दर मौका गुमायो ।

खेलको ३८औं मिनटमा अर्काडिउज मिलिकले गोल गर्दै नापोलीलाई पहिलो अग्रता दिलाए । यसपछि दोश्रो हाफमा भेरोनाका फराओनीले गरेको गोल भारबाट गोल नभएको पाईएपछि नापोलीबिरुद्ध बराबरीको मौका गुमेको थियो । खेलको ९०औं मिनटमा हर्भिङ्ग लोजानेले कर्नरबाट पाएको बललाई सदुपयोग गर्दै गोलमा परिणत गरेपछि नापोलीले २–० को जित आत्मसात गरेको थियो ।

गत साता कोपा ईटालियको उपाधि जितेको नापोलीका लागि सिरी ए मा शिर्ष चारमा रहँदै च्याम्पियनस् लिगमा भाग लिने मौका कायम राख्न यो जितले केही सहयोग गरेको छ । जितपछि छैठौ स्थानको नापोलीको २७ खेलमा ४२ अंक भएको छ ९औं स्थानको भेरोनाको ३८ अंक छ । खेल जित्दै स्थान सुधार्ने मौकाबाट भेरोना चुकेको छ ।

यस्तै मंगलबार राति नै भएको अन्य खेलमा काग्लियारीले स्पाललाई १–०, पार्माले जेनोआलाई ४–१ र टोरिनोले युडिनिजलाई १–० ले पराजित गरेको छ ।