अखबार नेपाल ट्रेन्डिङ

विराटनगर: पाँचौ संस्करणको महिला साफ च्याम्पियनसिपको उपाधिका लागि आज नेपाल र भारतबीच प्रतिष्पर्धा हुँदैछ ।

विराटनगरको सहिद रंगशालामा हुने खेल दिउँसो तीन बजे सुरु हुनेछ । दक्षिण एसियाली फुटबल प्रतियोगिताको उपाधि भिडन्तमा भारतसँग पराजित हुँदै आएको नेपालले घरेलु भुमिमा उपाधि रक्षा गर्न चाहन्छ । सुरुवाती तीन संस्करणमा फाईनलमा भारतसँग हारेको नेपालले पछिल्लो संस्करणमा भने सेमिफाईनलमा भारतसँगै पराजित भएको थियो ।

महिला फुटबलमा दुवै टोली १० पटक प्रतियोगितमा भिडेका छन् । १० खेलमा ७ खेल भारतले जितेको छ भने दुई खेल बराबरीमा सकिएको छ । पछिल्लो एक खेल नेपालले जितेको छ । दक्षिण एसियाली खेलकुद प्रतियोगिता सागमा खेलिएका ४ खेलमा तीन पटक भारत विजयी भएको भने एक खेल बराबरीमा सकिएको ईतिहास छ । नेपाली टोलीको मुख्य प्रशिक्षकमा हरि खड्का नियुक्त भएपछी नेपालले भारतसँग एक खेलमा जित र एक खेलमा बराबरी खेलेको छ ।