अखबार नेपाल ट्रेन्डिङ

काठमाडौं: नेपालमा कोरोना भाइरसका एक विरामी फेला परेको सरकारले जानकारी गराएको छ । फ्रान्सबाट कतार हुँदै आएका एक जना नेपाली नागरिकमा कोरोना भाइरस पोजिटिभ देखिएको स्वास्थ्य मन्त्रालयले जानकारी दिएको हो ।

आज मन्त्रालयमा आयोजित आकस्मिक पत्रकार सम्मेलनमा स्वास्थ्य तथा जनसंख्या मन्त्री भानुभक्त ढकालले गत चैत ४ गते नेपाल आएकी एक युवतीमा संक्रमण पुष्टि भएको जानकारी दिएका हुन् । उताबाट आएपछि उनलाई क्वारेन्टाइनमा राखिएको र रुघाखोकी लागेपछि स्वाब परीक्षण गर्दा आइतबार कोरोना भाइरसको संक्रमण देखिएको मन्त्री ढकालले जानकारी दिए । ती युवतीसँग भेटघाट गरेका सबै व्यक्तिलाई क्वारेन्टाइनमा राखिएको पनि मन्त्री ढकालले बताए ।

होम क्वारेन्टाइनमा रहँदा ती युवतीले भेटेका सबैलाई क्वारेन्टाइनमा राखेर स्वास्थ्य परीक्षण गरिने पनि मन्त्री ढकालले पत्रकार सम्मेलन मार्फत जानकारी दिए । संक्रमितत व्यक्ति १९ वर्षीया युवती रहेको र उपचारका लागि अस्पताल लगिएको छ । युवतीसँगै विमानमा को-को आएका थिए भन्नेबारे ट्रयाक गरिने पनि मन्त्रीले जानकारी दिएका छन् ।