अखबार नेपाल ट्रेन्डिङ

काठमाडौं: नेपाल सरकारले घोषणा गरेको प्रतिबन्ध उल्लंघन गर्दै विदेशी विमान कम्पनीले ६४ जना नेपालीलाई काठमाडौं ल्याएका छन् । अध्यागमन विभागका अनुसार थाइ एअरवेज र एअर इन्डियाले नेपालले आवागमनमा प्रतिबन्ध लगाएका मुलुकमा रहेका नेपालीहरुलाई काठमाडौं उतारेका हुन् ।

उनीहरुलाई खरिपाटीस्थित नेपाल विद्युत् प्राधिकरणको तालिम केन्द्रमा ‘क्वारेन्टाइन’मा राखिएको छ । यद्यपि, उनीहरु संक्रमित भए नभएको पुष्टि भएको छैन । क्वारेन्टाइनमा पठाइएका मध्ये ७४ वर्षीया वृद्धासहित चारजना महिला र अन्य पुरुष रहेका छन् । क्वारेन्टाइनमा राखिएकाहरुलाई ‘काउन्सिलिङ’ गर्न कठिनाइ भएपनि सम्झाइ बुझाइ गरेर राखिएको जनाईएको छ ।

क्वारेन्टाइनमा राखिएकाहरुको ‘स्वाब’ भने आइतबार संकलन गरिने भएको छ । परीक्षण ‘पोजेटिभ’ देखिए उपचारका लागि सहिद शुक्रराज ट्रपिकल सरुवा रोग नियन्त्रण अस्पताल टेकु लगिनेछ । आफ्नै इच्छाले नेपाल फर्किएका उनीहरु क्वारेन्टाइनमा रहँदाको खर्च आफैंले व्यहोर्नुपर्नेछ ।

सरकारले शुक्रबार राति १२ बजेपछि युरोप, खाडी, मलेसिया, इरान, दक्षिण कोरिया र जापानबाट कुनैपनि यात्री नेपाल आउन नपाउनेगरी प्रतिबन्ध लगाएको थियो । साथै, यी मुलुकबाट अन्य मुलुकलाई ‘ट्रान्जिट’ बनाएर पनि यात्री आउन नपाउने सरकारले जनाएको थियो । सरकारले यो सम्बन्धी परिपत्र विदेशी एअरलाइन्सहरूलाई पठाएको भएपनि त्यसको उल्लंघन गर्दै विदेशी एअरलाइन्सहरूले नेपाली नागरिकलाई ओसारेका हुन् ।

सरकारी निर्णय अटेर गरी काठमाडौंमा यात्री झार्ने एअरलाइन्स कम्पनीहरूलाई कारबाही गर्नका लागि नागरिक उड्डयन प्राधिकरणको ध्यानाकर्षण गराइसकेको अध्यागमन विभागले जनाएको छ ।