अखबार नेपाल ट्रेन्डिङ

काठमाडौं: रौतहटमा नाइके र प्रहरीबीच गएराति गोली हानाहान भएको छ । जिल्ला प्रहरी कार्यालय रौटहट र बाराबाट खटिएको संयुक्त प्रहरी टोलीले गएराति ११ बजे चन्द्रपुर नगरपालिका-४ स्थित जगलसहियाबाट कामेश्वर पटेल कुर्मीलाई गोली हानी नियन्त्रणमा लिएको हो ।

घाइते कुर्मीलाई उपचारका लागि चन्द्रपुर प्रालि अस्पतालमा लगिएको प्रहरीले जनाएको छ । एम्बुस थापेर बसिरहेका कुर्मीले प्रहरीमाथि गोली चलाएपछि आत्मरक्षाका लागि चार राउन्ड गोली चलाइएको प्रहरीले जनाएको छ । जिल्ला प्रहरी कार्यालय, रौतहटले दिएको जानकारी अनुसार, कुर्मीको साथबाट १ थान नलकटुवा पेस्तोल र त्यसमा लाग्ने ५ राउन्ड गोलीसमेत बरामद भएको छ ।

कुर्मीमाथि व्यक्ति हत्या लगायतका दर्जनौं अपराधका अभियुक्त समेत रहेको प्रहरीले जनाएको छ । प्रहरीमाथि जाइलागेपछि कुर्मीलाई खुट्टामा गोली हानेर नियन्त्रणमा लिएको जिल्ला प्रहरी कार्यालय रौतहटले जनाएको छ । वायाँ खुट्टामा २ राउन्ड गोली लागेर घाइते कुर्मीको चन्द्रपुर अस्पतालमा उपचार भइरहेको छ ।