अखबार नेपाल ट्रेन्डिङ

जनकपुरः प्रदेश नम्बर दुईको नामकरणका लागि मंगलबार भएको प्रदेश सभाको मतदानमा चारवटै प्रस्ताव अस्वीकृत भएका छन् । चार वटा नामका लागि मंगलबार दिनभर भएका मतदानमा कुनै प्रस्तावको पक्षमा पनि दुई तिहाई नपुगेपछि मतदान निरर्थक हुन पुगको हो ।

प्रदेश दुईमा प्रतिनिधित्व गर्ने दलहरुसँग दुई तिहाई मत नरहेका कारण मतदान प्रकृयाबाट समेत कुनै पनि प्रस्तावले दुई तिहाई मत प्राप्त गर्न सकेनन् । प्रदेश दुईको नामाकरणका लागि प्रस्तावित ‘मधेश’, ‘मध्यमधेश’, ‘जानकी’ र ‘मिथिला भोजपुरा’ चार वटै प्रस्ताव अस्वीकृत भएका छन् ।

प्रदेशका सत्तारुढ दल राजपा र समाजवादीले प्रस्ताव गरेको चौथो प्रस्ताव मधेस प्रदेशको प्रस्तावमा ६० मत परेको छ । विपक्षमा ४८ मत खसेको छ । एक मद बदर भयो । यो प्रस्तावमा दुई तिहाई मत पुग्न १२ मत मात्रै कमि भयो । त्यसअघि तेस्रो प्रस्ताव मध्य मधेस प्रदेशको पक्षमा ४२ मत परेको थियो । यो सँगै यो प्रस्ताव पनि अस्वीकृत भएको छ । मध्यप्रदेशको विपक्षमा ६५ मत खस्यो भने मिथिला–भोजपुराको पक्षमा २८ मत खसेको थियो । यस्तै विपक्षमा ७९ मत खसेको थियो ।

त्यस्तै नेकपाले गरेको जानकी प्रदेशको प्रस्ताव पनि अस्वीकृत भएको थियो । जानकी प्रदेशको पक्षमा ३७ मत खसेको थियो भने विपक्षमा ७० मत खसेको थियो । चारवटै प्रस्ताव अस्वीकृत भएपछि पुन अर्कोपटक मतदान गर्नुपर्ने भएको छ ।

प्रदेश दुईको प्रदेश सभामा कुल १ सय ७ सदस्य रहेका छन् । दुई तिहाई मतका लागि ७२ मत आवश्यक थियो । कुनैपनि प्रस्तावले बहुमतको आँकडा पार गर्न सकेन । कुनैपनि प्रस्तावले बहुतमत प्राप्त गर्न नसकेपछि प्रदेशको नामाकरणका लागि अब नयाँ प्रकृया अपनाउनु पर्नेछ ।