अखबार नेपाल ट्रेन्डिङ

काठमाडौं: शिक्षा, विज्ञान तथा प्रविधि मन्त्रालयले आगामी बिहीबारदेखि शुरु हुने माध्यमिक शिक्षा परीक्षा (एसईई) सावधानीपूर्वक सञ्चालन गर्न अपिल गरेको छ । शिक्षा, विज्ञान तथा प्रविधिमन्त्री गिरिराजमणि पोखरेलले यतिबेला कोरोनाको संक्रमण रोकथाम गर्ने र एसइई परीक्षलाई मनोबैज्ञानिक एवं त्रासमुक्त वातावरणमा सम्पन्न गर्ने जिम्मेवारी पूरा गर्नुपर्ने स्थिति रहेको अपिल जारी गर्दै एसईई परीक्षा सञ्चालनको सबै तयारी पूरा भएको बताएका छन् ।

मन्त्री पोखरेलले चैत ६ देखि १७ चैतसम्म हुने परीक्षामा देशभरका कुल ४ लाख ८२ हजार २ सय १९ परीक्षार्थी सहभागी हुने एसइई परीक्षाका लागि १ हजार ९ सय ९५ परीक्षा केन्द्र तोकिएको र परीक्षा केन्द्रमा परीक्षा अवधिभर हेल्थ डेस्क राख्ने प्रबन्ध मिलाउन ७ सय ५३ स्थानीय निकायलाई अनुरोध गरिएको छ ।

मन्त्री पोखरेलले विद्यार्थीको स्वास्थ्य सुरक्षा र वचावट पहिलो प्राथमिकता रहेको बताउँदै यस्तो विषम परिस्थितमा पनि बालबालिकाहरुको पढ्न पाउने हक अधिकार सुरक्षित हुनु पर्दछ भन्ने विषयमा नेपाल सरकार गम्भिर रहेको उल्लेख गर्दै यस्तो विषम परिस्थितिमा मन्त्रालयले उच्चस्तरीय समितिसँग संयोजन गरी यथोचित निर्णय लिने भएको हुँदा अनावश्यक हल्ला र अफवाहको पछि नलाग्न समेत मन्त्री पोखरेलले अपिल गरेका छन् ।