अखबार नेपाल ट्रेन्डिङ

काठमाडौं: लकडाउनका कारण दुई महिनादेखि झापाको दमकमा रोकिएका पूर्वराजा ज्ञानेन्द्र शाह परिवारलाई काठमाडौं आउन सवारी अनुमति मिलेको छ । सरकारको सर्वत्र आलोचनापछि पूर्व राजालाई काठमाडौँ आउन गृह मन्त्रालयले स्वीकृति दिएको हो ।

बिहीवार जिल्ला प्रशासन कार्यालय झापाबाट सवारी अनुमति पाएका शाहलाई पछि गृहले पास दिन अस्वीकार गरेको थियो । तर गृहमन्त्रालयको यो अस्वीकृतपछि सामाजिक सञ्जालमा समेत आलोचना भएपछि गृहले पूर्वराजा ज्ञानेन्द्रलाई काठमाडौं आउने अनुमति दिएको हो । शुरुमा दिएको यात्रा अनुमति गृह मन्त्रालयले रद्द गरिदिएको भएपनि पछि फेरि प्रक्रिया मिलाएर स्वीकृति दिइएको जिल्ला प्रशासन कार्यालय झापाका प्रमुख जिल्ला अधिकारी उदयबहादुर रानामागरले सञ्चारमाध्यमसँग बताए ।

लकडाउनपूर्व झापाको दमक पुगेको पूर्वराजा शाह सरकारले लकडाउन घोषणा गरेपछि त्यही बस्दै आएका थिए । शाहलाई सवारी अनुमति रोकेकामा राप्रपाका अध्यक्ष कमल थापाले पनि ट्वीटरमार्फत् सरकारको आलोचना गरेका छन् ।