अखबार नेपाल ट्रेन्डिङ

काठमाडौं: नेपालमा भ्रष्टाचार निर्मुल पार्ने कुरा आईरहँदा स्थानीय निकायदेखि केन्द्रमा भईरहेको भ्रष्टाचारको समाचारले निर्मुलको नारालाई गिज्याईरहेको भान हुन्छ ।

सत्तापक्ष र प्रतिपक्षबीच यही विषयलाई लिएर विभिन्न कालखण्डमा आरोप प्रत्याआरोप लगाउँदै आन्दोलन गर्नु नेपालका राजनीतिक दलहरुको परम्परा नै भईसकेको छ ।

कहिले सासुको पालो त कहिले बुहारीको पालो भने झै यस पटक प्रमुख प्रतिपक्षी दल नेपाली कांग्रेसले दशैं, तिहार लगत्तै भ्रष्टाचारको विरोधमा देशव्यापी रुपमा आन्दोलन चर्काउने भएको छ ।

यसभन्दा अगाडी कांग्रेस नेतृत्वको सरकारको पालामा नेकपा एमालेले पनि यस्तै आन्दोलन गर्दै आएको थियो ।

अहिले नेपाल कम्युनिष्ट पार्टीको सरकार छ । यसै मेसोमा यसपटक नेपाली कांग्रेसले देशैभर सडक आन्दोलन गर्ने भएको छ । यस विषयमा पार्टी सभापति तथा पूर्व प्रधानमन्त्री शेरबहादुर देउवाले आफू निकटका नेताहरुसँगको परामर्श गरेर यस्तो आन्दोलनको तयारी थालेका हुन ।

सभापति देउवाले आफू निकटका ब्यक्तिहरुसँग भेटघाट गरी ‘देश संकटमा भएको बेलामा पनि जताततै भ्रष्टाचार मौलाउनु सुखद छैन, यस्तो अवस्थामा कांग्रेसले टुलुटुलु हेरेर बस्नु हुँदैन, हामी कोभिड–१९ को संक्रमणको जोखिमलाई हेरेर अहिलेसम्म चुप लागेर बसेका थियौं । अब चाडपर्व सकिने लगत्तै हामी सरकारको विरोधमा सडकमा जान्छौं ।’ भनेर आफ्नो तयारीबारे बताएका थिए ।

केही हप्ता अगाडी नै यस्तो खालको आन्दोलन गर्ने भनिएपनि कोरोनाका कारण तत्काल आन्दोलन नगर्ने कांग्रेसले यसअघि बताएको थियो । नेपाली कांग्रेसले सरकारले कोरोना संक्रमण रोकथाम तथा नियन्त्रणको लागि प्रभावकारी कदम चाल्न नसकेको भन्दै असन्तुष्टि पोख्दै आएको छ । यस विषयमा पार्टीका वरिष्ठ नेता रामचन्द्र पौडेलले प्रधानमन्त्री केपी शर्मा ओलीलाई बालुवाटारमा भेटेरै पार्टीको तर्फबाट सुझाव दिएका थिए ।