अखबार नेपाल ट्रेन्डिङ

काठमाडौं: कोरोना भाइरस महामारीको जोखिम बढेपछि देशभरका विभिन्न १८ जिल्लामा स्थानीय प्रशासनले सूचना जारी गरि निषेधाज्ञा गरेको छ ।

बुधबारसम्म देशका विभिन्न १४ जिल्लामा निषेधाज्ञा जारी गरिएको थियो । बिहीबार गृहमन्त्रालयले थप तीन जिल्लामा निषेधाज्ञा जारी गरिएको जनाएको छ ।

गृहमन्त्रालयका अनुसार बिहीबार सिराहको मिर्चैयामा २२ गतेदेखि ३२ सम्म निषेधाज्ञा जारी गरिएको छ । यस्तै बर्दियामा जिल्लाभर लागू हुने गरी २५ गतेदेखि २९ गतेसम्म निषेधाज्ञा जारी गरिएको छ । यस्तै जुम्लाको कनका सुन्दरी गाउँपालिकामा २२ गतेदेखि अनिश्चितकालीन निषेधाज्ञा जारी गरिएको छ ।

बुधबारसम्म सप्तरी, धनुषा, नुवाकोट, बाँके, मोरङ, पर्सा, बारा, महोत्तरी, झापा, सुनसरी, बझाङ, दार्चुला, सर्लाही र स्याङ्जा जिल्लाका विभिन्न क्षेत्रमा निषेधाज्ञा जारी गरिएको थियो। सप्तरी, बाँके, पर्सा, बारा, सर्लाही र स्याङ्जा जिल्लाभर निषेधाज्ञा जारी गरिएको छ ।

पर्सा, बारा र सर्लाहीमा अनिश्चितकालीन निषेधाज्ञा छ भने सप्तरीमा साउन २६, बाँकेमा साउन २४ र स्याङ्जामा साउन २३ गतेसम्म निषेधाज्ञा लागु हुनेछ । महोत्तरीको जलेश्वर नगरपालिका र महोत्तरी गाउँपालिका क्षेत्र, धनुषाको जनकपुरधाम उपमहानगरपालिका र क्षीरेश्वरनाथ नगरपालिका, नुवाकोटको सदरमुकाम क्षेत्र, बझाङको थलारा गाउँपालिका–५ र केदारस्यू गाउँपालिका ६ र ७ मा निषेधाज्ञा लगाइएको छ ।