अखबार नेपाल ट्रेन्डिङ

काठमाडौं: बाराको जीतपुर–सिमरा उपमहानगरपालिका–२२, चुरियामाईमा तीर्थयात्री बोकेको बस दुर्घटनामा ज्यान गुमाएका मृत्यु भएका ७ जनाको परिचय खुलेको छ ।

दुर्घटनामा भारतको राजस्थानका ६० वर्षीया सत्यवती सिंह, ६५ वर्षीया मीरादेवी सिंह, ६५ वर्षीय श्रीकान्त चतुरवेदी, ६७ वर्षीया वैजन्ती देवी, ६७ वर्षीय बहादुर सिंह र ७० वर्षीय राजेन्द्र चतुर्वेदीको मृत्यु भएको छ । यस्तै महोत्तरीको लोहारपट्टीका ४१ वर्षीय विजयलाल पण्डितको पनि मृत्यु भएको जिल्ला प्रहरी कार्यालय मकवानपुले जानकारी दिएको छ ।

बसमा चालकसहित २६ यात्रु सवार थिए । दुर्घटनामा १७ जना घाइते भएका छन् । घाइतेको हेटौँडा अस्पताल, सञ्चो अस्पताल, चुरेहिल अस्पताल र चितवनस्थित पुरानो मेडिकल कलेज, भरतपुरमा उपचार भइरहेको छ । काठमाडौंबाट जनकपुरतर्फ जाँदै गरेको प्रदेश ०३–००१ ख ७९९४ नम्बरको बस राति २ बजेतिर चुरियामाई अगाडि दुर्घटना भएको हो ।