अखबार नेपाल ट्रेन्डिङ

काठमाडौं: प्रधानमन्त्री निवास बालुवाटारमा राति अबेरसम्म चलेको बैठकले मन्त्रालय बाँडफाँड टुंग्याएपछि सरकारले आज मन्त्रिपरिषद् विस्तार गर्ने भएको छ ।

मंगलबार दिउँसो १ बजे नयाँ मन्त्रीको शपथ गराउने सत्तासाझेदार दलहरूको तयारी छ । १० पुसमा प्रधानमन्त्री नियुक्त भएका प्रचण्डले ११ पुसमा पहिलो पटक आठ सदस्यीय मन्त्रिपरिषद् विस्तार गरेका थिए ।

‘कुन-कुन पार्टीले कुन-कुन मन्त्रालयको जिम्मेवारी लिने भन्ने कुरा सहमति भइसकेको छ’, गृहमन्त्री रवि लामिछानेले भने ‘को–को मन्त्री बने भनेर मंगलबार नै नाम बाहिर आउनेछ ।’ यसअघि प्रधानमन्त्री प्रचण्ड र एमालेका अध्यक्ष ओलीबीच भएको भेटवार्तामा मन्त्रालयको भागवण्डा टुंगिसकेको छ ।

सोमबार पाँच घण्टाभन्दा बढी चलेको सत्ता गठबन्धनको बैठकमा नेकपा माओवादीका अध्यक्ष एवं प्रधानमन्त्री पुष्पकमल दाहाल ‘प्रचण्ड’, एमालेका अध्यक्ष केपी शर्मा ओली, रास्वपाका अध्यक्ष लामिछाने, राप्रपाका अध्यक्ष राजेन्द्र लिङ्देन र जसपाका अध्यक्ष उपेन्द्र यादवलगायत सहभागी थिए ।

उच्चस्तरीय राजनीतिक संयन्त्रमा भएको समझदारी अनुसार मन्त्रिपरिषद् विस्तार लगत्तै अपराह्न ४ बजे प्रधानमन्त्री प्रचण्डले प्रधानमन्त्री निवास बालुवाटारमा कांग्रेस, एकीकृत समाजवादीसहित सरकारलाई विश्वासको मत दिने दलहरूको सर्वदलीय बैठक बोलाएका छन् ।