कांग्रेसका तीन नेताले गरे देउवा हठको आलोचना
वि.सं.२०७९ पुस १२ मंगलवार १२:४३
काठमाडौं: नेपाली कांग्रेसका नेता डा शेखर कोइरालाले संसद्को तेस्रो शक्ति भए पनि माओवादीले सरकारको नेतृत्व गर्ने अवस्था आउनुलाई अराजनीतिकको संज्ञा दिएका छन् ।
सोमबार विज्ञप्ति जारी गर्दै आफूहरूले चुनावअघि गठबन्धन नगरौँ भन्दा त्यसलाई महत्वहीन ठानिएको बताएका हुन् । संविधानको रक्षा र समृद्धिको यात्रा गर्ने भनेर पार्टी सभापति शेरबहादुर देउवा नेतृत्वको गठबन्धनको निरन्तरता किन र कसरी असम्भव भयो भनेर गम्भीर प्रश्न उठेको उनको भनाइ छ । ‘हामीले यसको चित्तबुझ्दो जवाफ कांग्रेस कार्यकर्ता, समर्थक, शुभेच्छुकलगायत सबै आम नेपालीमाझ दिनुपर्छ भन्ने मान्यता म राख्छु,’ उनले भनेका छन् ।
कोइरालाले पछिल्लो घटनाक्रमले पार्टीका नेता तथा कार्यकर्ता निराश हुनुपर्ने कुनै कारण नरहेको प्रस्ट पारेका छन् । सत्ता गुम्दैमा कांग्रेसको शक्ति नगुमेको उनको भनाइ छ । ‘साथीहरूमा तत्कालका लागि नयाँ र अप्ठ्यारो परिस्थितिमा पार्टी पुग्यो भन्ने निराशा आउनु अस्वाभाविक होइन । साथीहरू निराश हुनुपर्ने कुनै कारण छैन,’ कोइरालाले भनेका छन्, ‘हामी निरन्तर संवाद र सम्पर्कमा रहँदै तपाईंहरूका घरआँगनमा आउनेछौँ ।’ उनले किन गठबन्धनलाई निरन्तरता दिन सकिएन भनेर नेतृत्वसँग समीक्षा गर्ने पनि उल्लेख गरेका छन् । ‘किन यस्तो परिस्थिति निर्माण भयो भनेर हामी नेतृत्वसमक्ष र कार्यसमितिमा निर्मम समीक्षा गर्नेछौँ,’ कोइरालाले भने, ‘सत्ता गुम्दैमा कांग्रेसको शक्ति गुमेको छैन । हामी थप सशक्त भएर कांग्रेस सशक्तीकरणको अभियानमा जुट्न दृढ संकल्प गर्छौँ ।’
कांग्रेस पार्टीलाई सुदृढ कसरी बनाउने भन्नेबारे सोचिरहेका छौँ
कांग्रेस महामन्त्री गगन थापाले पार्टीलाई पुनः उठाउने बताएका छन् । हातमा आएको सत्ता र अवसर पार्टी नेतृत्वकै कमजोरीका कारण गुमेपछि पोखरामा जारी नेपाल लिटरेचर फेस्टिभलको अन्तिम दिन सोमबार उनले कांग्रेसलाई पुनः जरैबाट उठाउने बताएका हुन् ।
सभापति शेरबहादुर देउवाले पार्टीमा छलफल गरेर मात्र गठबन्धनबारे निर्णय गर्छु भन्नुभए पनि आफूहरूसँग कुनै कुराकानी नगरेको उनको भनाइ थियो । गठबन्धनको निर्णय गर्दा सभापतिले बोलाउनेमा आफू पनि पर्नेमा विश्वस्त भए पनि नबोलाएपछि अपमानित भएर पोखरा आएको उनले बताए ।
हारजितको प्रकरण सकिएकाले अब पुनः कांग्रेसलाई उठाइने उनले बताए । ‘हारजितको कुरा एकछिन आयो, गयो । कांग्रेसमा जोडिँदा एउटा प्रतिष्ठा हुन्थ्यो । त्यो कुरा फेरि बनाइन्छ । हामी कांग्रेस पार्टीलाई सुदृढ कसरी बनाउने भन्नेबारे सोचिरहेका छौँ,’ उनले भने ।
धेरै गोल हामीले गर्यौँ, तर पनि कप अर्कोले जित्यो
कांग्रेसका अर्का महामन्त्री विश्वप्रकाश शर्माले यसपटक समूह चरणमा जितेर हारेको कांग्रेस आगामी पाँच वर्षपछि डिफेन्डिङ च्याम्पियन बन्ने बताएका छन् । यसपटक आफूहरू जितेर पनि हारेर आएको उनको भनाइ थियो ।
‘अस्ति वर्ल्डकपमा सबैभन्दा धेरै गोल एम्बाप्पेले गरे, तर कप भने अर्केले जित्यो । यसपटकको निर्वाचनमा सबैभन्दा धेरै गोल हामीले गर्यौँ, तर पनि कप अर्कोले जित्यो । अबको पाँच वर्षपछि हामी डिफेन्डिङ च्याम्पियनलाई हराउँछौँ र च्याम्पियन बन्छौँ,’ शर्माले भने ।
हाल सिर्जना भएको राजनीतिक घटनाक्रमलाई कांग्रेसले गहिरो विश्लेषण गरी आउँदा दिनका लागि थप यात्रा तय गर्ने उनले बताए । शर्माले आइतबारको घटना कांग्रेसका लागि एउटा टर्निङ प्वाइन्ट रहेको बताए ।
निर्वाचनमा पहिलो पार्टी बनेर पनि सरकारको नेतृत्व गर्न नपाइने नियतिले नेपालको निर्वाचन प्रणाली र संविधानमै पुनः सुधार गर्नुपर्ने उनले टिप्पणी गरे । समूह चरणमा कांग्रेसले जुन अंक पाएको छ, त्यो सुरक्षित नै रहेको शर्माले बताए ।
वि.सं.२०७९ पुस १२ मंगलवार १२:४३