अखबार नेपाल ट्रेन्डिङ

काठमाडौं: एसीसी इस्टर्न रिजन पुरुष टी-ट्वान्टी कप क्रिकेटको आफ्नो तेस्रो खेलमा नेपालले आज आयोजक राष्ट्र थाइल्याण्डको सामना गर्दैछ ।

टेर्डथाई क्रिकेट मैदानमा मैदान उत्रँदा दुवै टोली पहिलो जितको खोजीमा हुनेछन् । प्रतियोगिताबाट बाहिरिसकेको थाइल्याण्डलाई भन्दा नेपाललाई यस खेल निकै महत्वपूर्ण रहेको छ । नेपाल यस प्रतियोगिताबाट उपाधि जित्दै एसिया कप छनोटमा पुग्न चाहन्छ ।

पाँच राष्ट्र सहभागी इस्टर्न रिजनको फाइनल पुग्ने दुई टिमले एसिया कप छनोटमा स्थान बनाउने छन् । त्यसैले शीर्ष दुईमा स्थान बनाउन नेपाललाई थाइल्याण्डविरुद्ध जित निकाल्नुको विकल्प छैन । नेपालले जित निकालेर पनि शीर्ष दुईमा स्थान बनाउन सक्ने छैन । नेपाललाई अन्य टोलीको नतिजामा पनि भर पर्नु पर्नेछ ।

मुख्यतय नेपालले शीर्ष दुईमा स्थान बनाउन हङकङको भर पर्नुपर्नेछ । हङकङले बाँकी रहेको खेलमा फराकिलो जित हात पारे नेपालले शीर्ष दुईमा स्थान बनाउने समिकरण रहेको छ । जसमा नेपालले समेत बाँकी खेलमा फराकिलो जित निकाल्नु जरुरी रहेको छ । त्यसैले आजको खेलमा नेपालले आयोजकमाथि ठुलो रन रेट बनाउने लक्ष्य सहित खेल्नु पर्नेछ ।

नेपाल २ खेलमा २ हार व्यहोर्दा अंक जोड्न सकेको छैन । नेपाल तालिकाको पुछारबाट दोस्रो स्थानमा रहेको छ । थाइल्याण्ड समेत ३ खेलमा कुनै अंक जोड्न नसक्दा तालिकाको पुछारमा रहेको छ ।