अखबार नेपाल ट्रेन्डिङ

काठमाडौं: सहिद स्मारक ए डिभिजन लिग अन्तर्गत आज दुई खेल हुदैछ । पहिलो खेलमा विभागीय टोली नेपाल पुलिस र शसस्त्र प्रहरी बलको एपीएफ भिड्ने छन् । लिगमा तीन खेल जितेको पुलिस ११ अंक सहित तालिकाको आठौं स्थानमा छ । लिगमा १ जित सहित ५ अंक जोडेको एपीएफ तालिकाको १३ औं स्थानमा रहेको छ ।

एन्फा कम्प्लेक्स सातदोबाटोमा हुने नवौं चरणको पहिलो खेलमा विभागीय दुबै टोली महत्वपुर्ण तीन अंक हासिल गर्न चाहन्छन् । आज दुबै टिम आफ्नो विभागको इज्जत जोगाउने लक्ष्य सहित मैदानमा उत्रनेछन् । लिगमा रेलिगेशन जोनको नजिक रहेको एपीएफ पुलिसलाई हराउँदै कम्तिमा तालिकामा सुधार गर्न चाहन्छ । एपीएफ पुछारको टोली सरस्वतीभन्दा ४ अंकले माथि छ । पुलिस भने शीर्ष ८ मा रहेको छ । उसले लिगमा शीर्ष ६ को लक्ष्य राखेको छ ।

यसैबीच स्टार खेलाडी बोकेर उपाधि होडमा हिडेको मछिन्द्र र ललितपुरको थ्रीस्टार क्लब लिगको नवौं चरणको खेलमा आज भिड्दैछन् । लिगको ५८ औं खेलमा थ्रीस्टार र असनको मछिन्द्र क्लब एक आपसमा भिड्न लागेका हुन् । खेल दशरथ रंगशालामा हुनेछ । थ्री स्टारलाई पराजित गर्दै मछिन्द्र लिगको शीर्ष स्थानमा फर्कन चाहन्छ । यता, थ्री स्टार पनि मछिन्द्रलाई पराजित गर्दै पहिलो पटक शीर्ष स्थानमा उक्लिन चाहन्छ । मछिन्द्रलाई पराजित गरे थ्री स्टार हेड टु टु हेडका आधारमा शीर्ष स्थानमा पुग्नेछ । थ्री स्टार पहिलो पटक लिगको शीर्ष स्थानमा पुग्न प्रयास गर्नेछ ।