अखबार नेपाल ट्रेन्डिङ

काठमाडौः सहिद स्मारक ए डिभिजन लिग अन्तर्गत आज तालिकाको पुछारमा रहेका शेर्पा र फ्रेण्ड्सबीच आमने सामने हुदैछन् । खेल दशरथ रंगशालामा हुनेछ । रेलिगेशन जोनमा रहेका दुबै टिम पहिलो जित निकाल्दै लिग तालिकामा सुधार गर्न चाहन्छन् ।

दुबै टिम जितका लागि मैदानमा उत्रदैछन् । लिगको ४ खेल सकिँदा दुवै टिमले जित निकाल्न सकेका छैनन् । दुई खेल बराबरी खेलेको शेर्पा २ अंक सहित तालिकाको १२ औं स्थानमा छ । फ्रेन्ड्स एक बराबरी र तीन हार सहित एक अंक जोडेर तालिकाको १३ औं स्थानमा छ । दुवै टिम प्रतियोगितामा पहिलो जितको खोजीमा रहेका छन् । लिगको सुरुवाती खेलमा आर्मीसँग २–१ गोल अन्तरमा रोकिएको फ्रेण्ड्सले दोस्रो खेलमा ब्रिगेड ब्वाईजसँग अन्तिम समयमा लगातार २ गोल ब्यहोर्न पुगेको थियो । यस्तै तेस्रो खेलमा मछिन्द्रसँग ३–० गोल अन्तरले पराजित फ्रेण्ड्स अन्तिम खेलमा भने साविक विजेता मनाङलाई बराबरीमा रोक्न सफल भएको थियो ।

यता, शेर्पा पनि फ्रेण्ड्सलाई पराजित गर्दै तीन अंक ल्याउने दाउमा छ । शेर्पाले पहिलो खेलमा विभागीय टोली पुलिससँग गोलरहित बराबरीमा रोकिएको थियो । दोस्रो खेलमा अर्को विभागीय एपीएफसंग बराबरी खेलेको शेर्पाले तेस्रो खेलमा आर्मीसँग २–० र ब्रिगेड ब्वाईजसँग १–० को हार ब्यहोर्नु परेको थियो ।