अखबार नेपाल ट्रेन्डिङ

काठमाडौं: १३औं दक्षिण एसियाली खेलकुद (साग) अन्तर्गत महिला फुटबलमा नेपाली महिला टोली फाइनलमा भारतसँग २-० गोल अन्तरले पराजित भएको छ ।

पोखरा रंगशालामा भएको खेलमा नेपाली महिला फुटबल टोलीले रजत पदकमा चित्त बुझाएको छ । नेपालविरुद्ध भारतकी एनजी बालादेवीले गोल गरिन् । उनले खेलमा १७औं र ५५ औं मिनेटमा भारतका लागि गोल गरेकी हुन् ।

घरेलु मैदानमा भएको सागमा भारतलाई हराउँदै स्वर्ण जित्ने नेपाली खेलाडीको सपना अपुरो भएको छ । नेपाली महिला टोली नेपाल १२औं सागमा पनि भारतसँग पराजित हुँदै रजतमा समेटिएको थियो ।

प्रशिक्षक हरि खड्काले पदबाट राजीनामा

महिला फुटबल टिमका प्रशिक्षक हरि खड्काले पदबाट राजीनामा दिएका छन् । साग महिला फुटबलको फाइनलमा भारतसँग २-० ले पराजित भएसँगै खड्काले राजीनामाको घोषणा गरेका हुन् ।

पोखरामा भएको फाइनल हारसँगै नेपालले तेस्रो पटक रजतमा चित्त बुझाउनु परेको छ । खेलपछि सञ्चारकर्मीहरुसँग कुरा गर्दै खड्काले भने, ‘गोल्डको टार्गेट लिएर हिँडेको हुँ । यो पुरा गर्न नसक्दा मैले नैतिकताका आधारमा मुख्य प्रशिक्षकबाट राजीनामा दिएको छु ।’

खड्काको प्रशिक्षणमा नेपालले साफ च्याम्पियनसिप फुटबलको फाइनलमा भारतसँगै हारेको थियो ।