अखबार नेपाल ट्रेन्डिङ

एजेन्सी: बार्सिलोनाले च्याम्पियन्स लिगमा जित हासिल गरेको छ । मंगलबार राति भएको खेलमा बार्सिलोनाले बोरुसिया डर्टमण्डलाई ३-१ ले हराएको हो । बार्सिलोनाको जितमा लुईस स्वारेज, मेस्सी र एन्टोनी ग्रिजम्यानले समान एक-एक गोल गरे । जाडोन साञ्चोले डर्टमण्डका लागि एक गोल फर्काए ।

खेलमा अग्रता बार्सिलोनाले २९ औ मिनेटमा स्वारेजको गोलबाट लिएको थियो । उनले मेस्सीको पासलाई सदुपयोग गर्दै बार्सालाई अग्रता दिलाएका हुन् । त्यसको चार मिनेटपछि मेस्सीले घरेलु टोली बार्साको अग्रता दोब्बर पारेका थिए । उनले क्लबका लागि ६ सय १३ गोल गर्न सफल रहे । मेस्सीकै पासलाई सदुपयोग गर्दै ६७औ मिनेटमा ग्रिजम्यानले बार्सिलोनाका लागि तेस्रो गोल गरे । युवा स्टार सान्चोले ७७ औ मिनेटमा पाहुना टोलीका लागि एक गोल फर्काए ।