अखबार नेपाल ट्रेन्डिङ

काठमाडौं: विश्व फुटबल महासंघ (फिफा) का अध्यक्ष जियानी इन्फान्टिनोले पुरुष विश्वकपलाई भविष्यमा ६४ टोलीसम्म विस्तार गर्ने सम्भावनाबारे विश्वकपपछि अध्ययन गरिने बताएका छन् । सन् २०२६ मा पहिलो पटक ४८ टोलीसहित आयोजना भएको विश्वकप सफल भएको उल्लेख गर्दै इन्फान्टिनोले अब ६४ टोलीको प्रतियोगिता कसरी सम्भव हुन्छ भन्ने विषयमा छलफल गरिने बताए ।

‘विश्वकप युरोप र दक्षिण अमेरिकाका लागि मात्र होइन, सम्पूर्ण विश्वका लागि हो । प्रत्येक राष्ट्रले विश्वकप खेल्ने सपना देख्न पाउनुपर्छ,’ इन्फान्टिनोले भने । उनका अनुसार साना राष्ट्रलाई विश्वकपमा अवसर दिए उनीहरूको फुटबलको स्तर अझ उकासिनेछ ।

इन्फान्टिनोले ४८ टोलीको विश्वकपको सफलताको उदाहरण दिँदै यसपटक १० मध्ये ९ अफ्रिकी टोली नकआउट चरणमा पुगेको उल्लेख गरे । ‘अघिल्लो विश्वकपमा अफ्रिकाबाट ५ टोली मात्र थिए । अहिले धेरै टोलीले अवसर पाएपछि उनीहरूले आफ्नो क्षमता देखाएका छन्,’ उनले भने ।

२०३० विश्वकपका लागि पनि प्रस्ताव

दक्षिण अमेरिकी फुटबल महासंघले सन् २०२५ मा २०३० विश्वकप ६४ टोलीको बनाउन औपचारिक प्रस्ताव राखेको थियो । तर यसबारे अहिलेसम्म कुनै निर्णय भएको छैन । २०३० को विश्वकप मुख्य रूपमा स्पेन, पोर्चुगल र मोरक्कोले आयोजना गर्नेछन् भने प्रतियोगिताको शताब्दी मनाउन उद्घाटन खेलहरू अर्जेन्टिना, उरुग्वे र पाराग्वे मा हुनेछन् ।

फिफाले परिषद्का सदस्यबाट आएका सबै प्रस्तावमाथि छलफल गर्नु आफ्नो दायित्व भएको जनाएको छ । अन्तिम निर्णय फिफा परिषद्ले गर्ने भए पनि ६४ टोलीको विश्वकप तत्काल लागू हुने संकेत भने देखिएको छैन ।