अखबार नेपाल ट्रेन्डिङ

काठमाडौं: प्रथम सुनुवार राष्ट्रसेवक कप-२०८१ फुटसल प्रतियोगिताको उपाधि फ्रेण्डसीप युथ क्लब दोलखा ‘बी’ ले उचालेको छ । जितसँगै फ्रेण्डसीपले नगद २५ हजार रुपैयाँ सहित ट्रफी, मेडल र प्रमाणपत्र प्राप्त गरेको छ ।

त्यस्तै, दोलखाकै सेरेम्फु युथ क्लब उपविजेता बनेको छ । सेरेम्फुले नगद १५ हजार रुपैयाँ सहित ट्रफी, मेडल र प्रमाणपत्र प्राप्त गरेका छ भने लोकतान्त्रिक किरात सुनुवार संघ, नेपाल (सी) तृतीय हुँदै नगद पाँच हजार रुपैयाँ सहित ट्रफी, मेडल र प्रमाणपत्र प्राप्त गर्यो ।

प्रतियोगितामा ३० टोलीको सहभागीता रहेको थियो । खेल नकआउटको आधारमा माकालबारीस्थित मनकामना फुटसलको सेभेन ए साईडमा खेलाईएको थियो । प्रतियोगिताको उत्कृष्ट खेलाडी फ्रेण्डसीप युथक्लब दोलखा (बी)का राजकुमार सुनुवार, उत्कृष्ट गोलकिपर फ्रेण्डसीप युथक्लब दोलखा (बी)का नीर बहादुर सुनुवार र प्रतियोगितामा सिरिसे युवा सेवा समाजका दिलिप सुनुवार सर्वाधिक गोलकर्ता बने भने प्रतियोगितामा सहभागी टोली मध्येबाट इलाम युथ क्लब अनुसासित टिम घोषित भयो ।

सुनुवार राष्ट्रसेवक समाज काठमाडौंले ‘सुनुवार सामाजिक संस्थाहरूबीच सहकार्य अभियान, सुनुवार समुदायको राष्ट्र निर्माणमा सामुहिक योगदान’ भन्ने मुल नाराको साथ संविधान दिवस तथा वार्षिक साधारणसभाको अवसरमा सुनुवार-सुनुवार समुदायका सामाजिक संस्थाहरूबीच आपसी समन्वय, सहकारिता र हार्दिकता अभिवृद्धि गर्ने उद्देश्यले आयोजित प्रथम राष्ट्रसेवक कप-२०८१ फुटसल सफलतापूर्वक सम्पन्न भएको संस्थाका अध्यक्ष अमरदीप सुनुवारले बताए ।