अखबार नेपाल ट्रेन्डिङ

एजेन्सी: युरोकप २०२४ को उपाधिका लागि आज मध्यराती फाइनलमा इंग्ल्यान्ड र स्पेन भिड्दैछन् । बर्लिनस्थित ओलम्पिक रंगशालामा हुने फाइनल नेपाली समय अनुसार मध्यरात १२:४५ बजे सुरु हुनेछ ।

स्पेन प्रतियोगितामा उत्कृष्ट खेल प्रदर्शन गर्दै फाइनलसम्मको यात्रा तय गरेको छ । आक्रमणमा विंगरद्वय निको विलियम्स र लामिन यमालसँग अल्भारो मोराटा र ड्यानी ओल्मोको समन्वय मिलेको छ । मिडफिल्डमा रोड्रीले उच्च प्रदर्शन गरिरहेका छन् ।

यता इंग्ल्यान्डले भने मिश्रित प्रदर्शन गरिरहेको छ । तर नतिजा आफ्नो पक्षमा पार्दै टोली फाइनलको यात्रा तय गर्न सफल भएको हो । सेमिफाइनलमा ओली वाटकिन्सले इन्ज्युरी समयमा गोल गर्दै टोलीको उपाधि भिडन्तमा स्थान पक्का गरेका थिए ।

युरोकपको दोस्रो संस्करण सन् १९६४ मा पहिलो उपाधि जितेको स्पेनले २००८ र २०१२ मा लगातार २ उपाधि जितेको जितेको थियो ।  निको विलियम्स, लामिन यमाल जस्ता उदीयमान र ड्यानि ओलमो, रोड्रि, फाबियान रुइज लगायतका अनुभवी खेलाडीको साथ पाएको स्पेनले जारी संस्करण शनशनीपूर्ण प्रदर्शन गरिरहेको छ ।

अन्तर्राष्ट्रिय फुटबलमा सँधै दाबेदार मानिए पनि उपाधिको आधारमा भने इङ्ल्याण्ड खासै सफल टोली होइन । सन् १९६६ मा घरेलु मैदानमा भएको फिफा विश्वकप जितेयता इङ्लिस टोलीले कुनैपनि ठूला उपाधि जित्न सकेको छैन ।

​जारी संस्करण टाईब्रेकर बाहेक इङ्ल्याण्डले ७ गोल गर्दा ४ गोल खाएको छ । विश्वस्तरीय खेलाडीहरु ह्यारी केन, जुड वेलिङ्घम, बुकायो शाका, फिल फोडेन लगायतको साथ पाएको इङ्ल्याण्ड इतिहास रच्ने दाउमा छ । यस पटक ६ खेलाडीले समान ३–३ गोल गर्दा इङ्ल्याण्डका कप्तान केन र स्पेनका ओलमो सर्वाधिक गोलकर्ताको दौडमा कायम छन् ।

स्पेन र इङ्ल्याण्डबीच अहिलेसम्म २७ खेल हुँदा स्पेनले १० र इङ्ल्याण्डले १४ खेल जितेका छन् भने ३ खेल बराबरी भएका छन् । पछिल्लो पटक यी दुईबीच २०१८ मा नेशन्स लिगमा भएको भेटमा इङ्ल्याण्ड विजयी भएको थियो ।