अखबार नेपाल ट्रेन्डिङ

एजेन्सी: अर्जेन्टिना कोपा अमेरिकाको नकआउट चरणमा पुगेको छ । समूह ‘ए’को खेलमा अर्जेन्टिनाले चिलीलाई १-०ले पराजित गर्दै नकआउट चरणमा पुगेको हो । जितका लागि लाउटारो मार्टिनेजले गरेको गोल खेलको निर्णायक बनेको थियो ।

मार्टिनेजले खेलको ८८औं मिनेटमा गोल गरेका थिए । अतिरिक्त समयमा मार्टिनेजले डि मारियाको पासमा अर्को गोल थप्ने मौका चुकाएका‌ थिए । लियोनल मेस्सीको कप्तानीमा रहेको अर्जेन्टिनाको दुई खेलबाट ६ अंक भएको छ । पहिलो खेलमा अर्जेन्टिनाले क्यानडालाई २-० ले हराएको थियो । चिली पहिलो खेलमा पेरुसँग गोलरहित बराबरीमा रोकिएको थियो ।

यो समूहको अर्को खेलमा क्यानाडाले १० खेलाडीमा समेटिएको पेरुलाई १-० ले हरायो । क्यानडाका लागि जोनाथन डेभिडले खेलको ७४औं मिनेटमा गरेको गोल नै निर्णायक बन्यो। उनले याकूब शफेलबर्गको पासमा गोल गरेका थिए । खेलको ५९औं मिनेटमा पेरु १० खेलाडीमा समेटिएको थियो । मिगुएल अराउजो रातो कार्ड खाँदै मैदान छाडेका थिए । समूहमा‌ अब अर्जेन्टिनाले पेरु र क्यानाडाले चिलीसँग खेल्नेछ ।