अखबार नेपाल ट्रेन्डिङ

काठमाडौं: साविक विजेता नेपालले एसीसी प्रिमियर कपको फाइनल प्रवेशका लागि आज यूएईसँग खेल्दैछ । अल अमेरत क्रिकेट मैदान ओमानमा हुने खेल नेपाली समय अनुसार बिहान ११:४५ बजेबाट सुरू हुनेछ ।

समूह चरणका सबै खेल जित्दै नेपाल विजेताका रुपमा सेमिफाइनल पुगेको हो । नेपालले समूह ‘ए’ को पहिलो खेलमा मलेसियालाई ५ विकेट, कतारलाई ३२ रन, हङकङलाई ८ विकेट र अन्तिम खेलमा साउदी अरेबियालाई ६ विकेटले हराउँदै अन्तिम ४ मा स्थान बनाउँदा यो समूहबाट हङकङ उपविजेताका रुपमा सेमिफाइनलमा पुगेको छ ।

यूएई भने घरेलु टोली ओमानसँग पराजित भएको थियो । ओमानसँग ९ विकेटले पराजित यूएईले बहराइनलाई ३७ रनले हराएको थियो । यस्तै कुवेतलाई ७ विकेटले हराएको थियो । कम्बोडियामाथि ९ विकेटको जित निकाल्दै यूएईले नेपालसँगको भेट पक्का गरेको हो ।

टी-२० अन्तर्राष्ट्रियमा नेपाल र युएईबीच अहिलेसम्म ९ खेल भएका छन् । नेपालले ५ खेल जित्दा युएईले ४ खेल जितेको छ ।  एक दिवसीयमा नेपालले सबैभन्दा बढि युएईसँग नै खेलेको छ । युएईसँग १५ एक दिवसीय अन्तर्राष्ट्रिय खेल्दा नेपालले ९ खेल जितेको छ भने ६ खेल गुमाएको छ ।