एसीसी प्रिमियर कप: आज नेपाल र हङकङ भिड्दै
वि.सं.२०८१ वैशाख ३ सोमवार ०७:३३
काठमाडौं: एसीसी प्रिमियर कपमा नेपालले आज हङकङसँग खेल्दैछ । खेल नेपाली समय अनुसार ११:४५ बजे ओमानको अल अमारात क्रिकेट मैदानमा हुनेछ । आजको खेल जित्दै नेपाल एक खेल अगावै सेमिफाइनलमा प्रवेश गर्न चाहन्छ ।
नेपालले पहिलो खेलमा मलेसियालाई ५ विकेट र कतारलाई ३२ रनले पराजित गरेको थियो । हङकङ भने साउदी अरबसँग पराजित भएको छ । आइतबार भएको खेलमा साउदीले हङकङलाई ५५ रनले हराएको थियो । पहिलो खेलमा हङकङले कतारलाई २६ रनले पराजित गरेको छ ।
हङकङविरुद्धको टी–२० क्रिकेटमा नेपालले हालसम्म खेलेका ११ मध्ये ६ खेलमा जित हात पारेको छ भने चार खेल हङकङले जितेको छ । एक खेलमा नतिजाविहीन भएको छ । पछिल्लो पटक सन् २०२४ को मार्चमा मोङ कोकमा भएको खेलमा हङकङले नेपाललाई ७३ रनले हराएको थियो । नेपालले समूह चरणको अन्तिम खेल बुधबार साउदी अरबसँग खेल्नेछ ।
एसीसी प्रिमियर कपमा नेपाल समूह ’ए’ मा छ । यो समूहमा नेपालसँगै हङकङ, मलेसिया, कतार र साउदी अरेबिया छन् । त्यस्तै समूह ‘बी’ मा बहराइन, कम्बोडिया, कुवेत, ओमान र संयुक्त अरब इमिरेट्स यूएई छन् । समूहका शीर्ष दुई टोली सेमिफाइनलमा पुग्नेछन् ।
वि.सं.२०८१ वैशाख ३ सोमवार ०७:३३