अखबार नेपाल ट्रेन्डिङ

काठमाडौं: नेपाल सुपर लिग अन्तर्गत आज दुई महत्त्वपूर्ण खेल हुँदैछ । अपरान्ह १ बजे हुने खेलमा पहिलो स्थानको पोखरा थन्डर्स र दोस्रो स्थानको धनगढी एफसी भिड्ने छन् भने दोस्रो खेलमा झापा एफसीले एफसी चितवनको सामना गर्ने छ ।

पोखराको ७ खेलमा १४ अंक रहेको छ र प्लेअफमा आफ्नो स्थान बनाइसकेको छ । पोखराको शीर्ष दुईमा रहने टुंगो नलागेको हुनाले पोखरालाई पनि आज जित्नै पर्ने दवाव रहेको छ । उता धनगढीले पनि आज जित हासिल गरेमा शीर्ष दुईमा आफ्नो स्थान पक्का गर्ने छ । यदि हार बेहोरेमा भने धनगढीको शीर्ष चारमा नरही प्लेअफ पुग्ने सम्भावना कम हुनेछ ।

आजै हुने दोस्रो खेलमा चितवन प्लेअफ जाने यात्राबाट बाहिरिसकेको छ भने झापाको भने प्लेअफ पुग्ने सम्भावना जितले सुनिश्चित गर्नेछ । चौथो स्थानमा रहेको झापाको ७ खेलमा १० अंक रहेको छ । पछिल्लो खेलमा धनगढी माथि जित हासिल गरेको झापाको मनोबल भने उच्च रहने छ ।

एनएसएलमा लिग तालिकाको शीर्ष २ टोलीले सिधै फाइनलमा छनोट हुने क्वालिफायर खेल खेल्नेछन् । क्वालिफायरमा पराजित हुने टोलीले भने लिगको तेस्रो र चौथो स्थान प्राप्त गर्ने टोलीको विजेतासँग अर्को क्वालिफायर खेल्न पाउनेछ ।