च्याम्पियन्स लिग: रियल म्याड्रिड, कोपनहेगन र बायर्न म्युनिख विजयी
वि.सं.२०८० कात्तिक २३ बिहीवार ०७:४१
एजेन्सी: युरोपेली च्याम्पियन्स लिग अन्तर्गत गएराती भएको खेलमा रियल म्याड्रिड, एफसी कोपनहेगन र बायर्न म्युनिखले जित हासिल गरेको छन् ।
रियलले पोर्चुगिज क्लब ब्रागा विरुद्ध ३-० को सहज जित निकालेको हो । रियलको जितमा ब्राहिम डियाज, भिनिसियस जुनियर र रोड्रीगोले एक एक गोल गरेका हुन् । खेलमा अग्रता लिने सुरुवाती अवसर भने ब्रागाले पाएको थियो । लुकास भास्केजले बोर्जा माथि बक्स भित्र फाउल गरेपछि ब्रागाले पेनाल्टी पाएको थियो । तर अल्भारो जालोको पेनाल्टी रियलका गोलरक्षक लुनिनले बचाएद।
रियलले अग्रता भने २७औं मिनेटमा डियाजको गोलबाट लिएको थियो । भिनिसियसले ५८औं मिनेटमा भास्केजको पासमा गोल गर्दै अग्रता दोब्बर बनाए । यस्तै ६१औं मिनेटमा भिनिसियसको पासमा रोड्रीगोले गोल गर्दै खेलमा रियलको जित सुनिश्चित गरे ।
यस्तै सोही समूहमा गएराति नै नापुली र युनियन बर्लिन १-१ को बराबरी खेलेका छन् । यस समूहबाट रियल ४ खेलमा १२ अंक जोड्दै दोस्रो चरणमा प्रवेश गरेको छ । दोस्रो स्थानमा रहेको नापोलिको ४ खेलमा ७ अंक छ । तेस्रो स्थानमा रहेको ब्रागाको ३ अंक रहँदा बर्लिनको १ अंक मात्र छ ।
यसैगरी लिग अन्तर्गत समूह ए को खेलमा म्यानचेस्टर युनाइटेडले हार बेहोरेको छ । १० जनामा सिमित म्यानचेस्टर युनाइटेडले रोमाञ्चक खेलमा एफसी कोपनहेगन विरुद्ध ४-३ को हार बेहोरेको हो । युनाइटेडले खेलको तेस्रो मिनेटमा नै खेलमा अग्रता लिएको थियो । स्कट मक्टोमिनेको पासमा रास्मस होइलन्डले गोल गर्दै खेलमा युनाइटेडलाई अग्रता दिलाएका थिए ।
खेलको २८औं मिनेटमा होइलन्डले नै व्यक्तिगत दोस्रो गोल गर्दै अग्रता दोब्बर बनाए । अलेहान्द्रो गार्नाचोको प्रहार कोपनहेगन गोलरक्षक ग्राबाराले बचाएपछि रिबाउन्डमा सहजै गोल गर्दै होइलन्डले अग्रता दोब्बर बनाए ।
तर त्यसपछि खेलमा युनाइटेडले लय गुमायो । ४२औं मिनेटमा मार्कस रासफर्डले रातो कार्ड खाँदै मैदान बाहिरिएपछि युनाइटेड १० जनामा सिमित भयो । पहिलो हाफमा तीन मिनेट र थपिएको समय मात्र बाँकी रहेको स्थितिमा युनाइटेडले हाफ टाइम अगावै दुई गोल खान पुग्यो ।
खेलको ४५औं मिनेटमा एन्करसनको क्रसमा डियोगो गोन्कालभेसले दिएको पासमा मोहम्मद एल्युनुसीले गोल गर्दै युनाइटेडले अग्रता एक गोलमा झारेका थिए । पहिलो हाफमा १३ मिनेट थपिएको अवस्थामा कोपनहेगनले नवौं मिनेटमा पेनाल्टीमा बराबरी गर्ने अवसर पायो ।
दोस्रो हाफमा युनाइटेडले पुनः अग्रता लिने सुनौलो अवसर पायो । ६८औं मिनेटमा कोपनहेगनका लेरागरले बक्समा ह्यान्डबल गरेपछि युनाइटेडले पेनाल्टी पाएको थियो । कप्तान ब्रुनो फर्नान्डेजले पेनाल्टीमा गोल गर्दै युनाइटेडलाई अग्रता दिलाए । ८३औं मिनेटमा पेनाल्टी दिएका लेरागरले पुनः बराबरी गोल गर्दै खेललाई ३-३ को स्थितिमा ल्याए । ८७औं मिनेटमा कोपनहेगनले खेलमा पहिलो पटक अग्रता लियो । रुनी बार्डघजिले रोमाञ्चक खेलमा आफ्नो टोलीलाई जित दिलाए ।
यस्तै सोही समूहमा रहेको बायर्न म्युनिखले गालाटासाराय विरुद्ध २-० को जित हासिल गरेको छ । बायर्नको जितमा ह्यारी केनले नै दुई गोल गरेका थिए । केनले खेलको ८०औं र ८७औं मिनेटमा गोल गर्दै बायर्नलाई जित दिलाएका हुन् । बायर्न दुई खेल अगावै अर्को चरणमा प्रवेश समेत गरेको छ ।
वि.सं.२०८० कात्तिक २३ बिहीवार ०७:४१