अखबार नेपाल ट्रेन्डिङ

काठमाडौं: कप्तान रोहित शर्माले शतकीय इनिङ्स खेलेपछि भारतले आईसीसी एकदिवसीय विश्वकपमा अफगानिस्तानमाथि सानदार जित हात पारेको छ । भारतले अफगानिस्तानलाई ८ विकेटले हराएको हो ।

जितका लागि पाएको २७३ रनको लक्ष्य घरेलु टोली भारतले खेल सकिन १५ ओभर बाँकी छँदै २ विकेट गुमाएर भेट्टायो । भारतलाई ८ विकेटले जिताउने क्रममा कप्तान शर्माले विश्वकप क्रिकेटमा सबभन्दा धेरै शतकको रेकर्ड बनाए । उनले ६३ बलमा १०० रन पूरा गरेका उनी १३१ रन बनाएर आउट भए । रोहितको एकदिवसीय क्रिकेटमा ३१औं र विश्वकप क्रिकेटमा सातौं शतक हो । यससँगै उनले विश्वकपमा सचिन तेन्दुलकरको रेकर्डलाई तोडे । भारतका सचिनले विश्वकपमा ६ शतक बनाएका थिए ।

यस्तै अफगानिस्तानविरुद्धको खेलमा विराट कोहली ५५ रनमा नट आउट रहे । ओपनर इशान किसन ४७ रनमा आउट भए । यसअघि पहिला ब्याटिङ गरेको अफगानिस्तानले ५० ‌ओभरमा ८ विकेट गुमाउँदै २७२ रन बनाएको थियो । उसका लागि हसमतुल्लाह शाहिदीले ८० र अजमातुल्लाह ओमरजाईले ६२ रन बनाए ।

भारतका जसप्रीत बुम्राहाले सर्वाधिक ४ विकेट लिए । हार्दिक पाण्डेयाले २ तथा कुलदीप यादव र सार्दुल ठाकुरले समान एक एक विकेट लिए । भारतले प्रतियोगितामा लगातार दोस्रो जित दर्ता गरेको छ । अफगानिस्तान सुरुआती दुवै खेलमा पराजित हुँदै प्रतियोगिताको पुछारमा छ ।