युनियन बर्लिनमाथि रियल म्याड्रिडको संघर्षपूर्ण जित
वि.सं.२०८० असोज ४ बिहीवार ०६:१६
एजेन्सी: स्पेनिस क्लब रियल म्याड्रिडले पहिलो पटक च्याम्पियन्स लिग खेलिरहेको युनियन बर्लिनमाथि संघर्षपूर्ण जित निकालेको छ ।
उच्च लयमा रहेका मिडफिल्डर जुड बेलिङघमको इन्जुरी टाइम गोलको मद्दतले घरेलु मैदान सान्टियागो बर्नाबेउमा रियल १-० ले विजयी भएको हो । बेलिङघम यस समरमा क्लबमा आबद्ध भएदेखि म्याड्रिडका लागि ६ खेलमा छैटौं गोल गर्न सफल रहे ।
म्याड्रिडले दोस्रो हाफमा दुई पटक पोस्टमा प्रहार गरेको थियो । पहिलो पटक च्याम्पियन्स लिगमा स्थान बनाएको बर्लिन भने निराश भएर घर फर्कन बाध्य रहयो । खेलको पहिलो हाफमा म्याड्रिडले अवसर सिर्जना गर्न सकेन । बर्लिनले पनि म्याड्रिडको डिफेन्स माथि समस्या उत्पन्न गराउन सकेन । दोस्रो हाफमा म्याड्रिडले सुधारिएको प्रदर्शन गर्न सफल भयो ।
पाँच वर्षअघि जर्मन फुटबलको दोस्रो श्रेणीमा खेलिरहेको युनियनले च्याम्पियन्स लिगको अर्को खेलमा आफ्नो स्पोर्टिङ ब्रागा विरुद्ध आफ्नो घरेलु मैदानमा खेल्दा पुनरागमन गर्ने आशा राख्नेछ । म्याड्रिडले सोहि दिन नापोलीको सामना गर्नेछ ।
वि.सं.२०८० असोज ४ बिहीवार ०६:१६