अखबार नेपाल ट्रेन्डिङ

काठमाडौं: ‘ए’ डिभिजन क्लब मछिन्द्र एफसीले एएफसी कप छनोट अन्तर्गत प्रारम्भिक चरणको दोस्रो खेलमा आज इन्डियन सुपर लिग (आईएसएल) क्लब मोहन बगान सुपर जायन्ट्ससँग खेल्दैछ ।

खेल कोलकताको साल्टलेक स्टेडियममा नेपाली समय अनुसार राति सवा ७ बजे सुरु हुनेछ । प्रारम्भिक चरणमा घरेलु मैदानमा भुटानी क्लब पारो एफसीलाई पराजित गरेको मछिन्द्र मोहन बगानलाई हराउँदै प्लेअफ पुग्ने लक्ष्यमा छ ।

यो खेल जित्ने टिमले बंगलादेशको ढाका अवामी वा माल्दिभ्सको क्लब इगल मध्ये एक टिमसँग प्ले अफ खेल्ने छ । प्ले अफ विजेता साउथ एसियन जोनबाट एएफसी कपमा छनोट हुनेछ ।

मनाङ मर्स्याङ्दी क्लबले एएफसी क्लब खेलेयता अन्य कुनैपनि क्लब एएफसी कपको समूह चरणमा पुग्न सकेको छैन । यसअघि त्रिभुवन आर्मी र मछिन्द्रले पछिल्लो दुई संस्करणमा प्रारम्भिक चरण खेले पनि समूह चरणमा पुग्न सकेका थिएनन् । पहिलो पटक प्रारम्भिक चरणको पहिलो खेल जितेर दोस्रो चरण पुगेको मछिन्द्रले भारतको बलियो टोली मोहन बगानलाई प्रतिद्वन्द्वी पाएको हो ।

अगष्ट ८ मा दशरथ रंगशालम पारो एफसीसँग खेल्दा मछिन्द्रको टिममा नरहेका फरवार्ड मेसुके ओलोमोउ मोहन बगान विरुद्ध खेलका लागि टिममा थपिएका छन् । मेसुकेको आगमनले टिम अझ बलियो बनेको छ ।

मछिन्द्रले एएफसी कपकै लागि भनेर कमजोर रहेको पोजिसनमा अन्य ‘ए’ डिभिजन क्लबाट ८ खेलाडी भित्र्याएको थियो । जसको प्रभाव पारो विरुद्ध पहिलो खेलमा पनि देखिएको थियो । पारोलाई ३-२ ले हराउँदा मछिन्द्रका लागि विमल घर्ती मगर, आयुष घलान र आफिज ओलावालेले गोल गरेका थिए ।

मछिन्द्रको फरवार्ड र डिफेन्स लाइन राम्रो देखिएको छ । मछिन्द्रका मुख्य प्रशिक्षक किशोर केसीले पनि डिफेन्स राम्रो रहेको र जितकै लागि खेल्ने प्रि म्याच कन्फेरेन्समा बताएका थिए ।

मछिन्द्रको टिममा पहिलो खेलमा गोल गरेका विमल, आयुष र ओलावालेसँगै मेसुके छन् । मिडफिल्डमा आन्द्रे नियासहित एरिक विष्ट र उत्सव राई हुनेछन् । फरवार्डमा आशिष चौधरी र मिडफिल्डमा लकेन लिम्बु पनि विकल्पमा छन् । यी दुवैले पारो विरुद्ध वैकल्पिक खेलाडीको रुपमा खेलेका थिए ।