अखबार नेपाल ट्रेन्डिङ

काठमाडौं: १४औं संस्करणको साफ च्याम्पियनसिप फुटबल प्रतियोगिता अन्तर्गत नेपालले आज समूह चरणको आफ्नो दोश्रो खेल भारतसँग खेल्दै छ ।

बेङ्गलोरस्थित श्री कान्तेराव स्टेडियममा हुने खेल नेपाली समयानुसार आज राति पौने आठ बजे शुरु हुनेछ । साफ च्याम्पियनसिपको १४औं संस्करण जारी रहँदा सर्वाधिक सफल टोलीको रुपमा परिचित भारतविरुद्ध नेपाल समूह चरणमै भिड्न लागेको हो ।

डेढ वर्षअघि माल्दिभ्समा सम्पन्न १३औं संस्करणको प्रतियोगिताको फाइनलमा नेपाल भारतसँग ३–० ले पराजित हुँदै उपाधि जित्नबाट बञ्चित बनेको थियो । गत संस्करणको हारको बदला लिने अवसर रहे पनि नेपाललाई भारतसँगको खेल जित्न सजिलो भने छैन ।

दक्षिण एशियाली फुटबल क्षेत्रमा नै एकछत्र राज गर्दै आएको घरेलु टोली भारतविरुद्ध मैदानमा उत्रिदै गर्दा नेपाल आज पहिलो जितको खोजिमा हुनेछ । यसअघि पहिलो खेलमा नेपाल कुवेतसँग ३-१ गोलले पराजित भएको थियो ।

यता पहिलो खेलमा पाकिस्तानलाई ४-० गोलले हराएको भारत भने लगातार दोश्रो जितको खोजिमा हुनेछ । नेपाल र भातरबिच यसअघि २३ खेलमा प्रतिस्पर्धा भईसकेको छ । जसमध्ये भारतले १६ खेल जित्दा नेपालले मात्र दुई खेल जित्न सकेको छ भने ५ खेल बराबरी खेलेको छ ।

प्रतियोगिता अन्तर्गत समूह ‘ए’ मा रहेको भारत पहिलो खेलबाट ३ अंकका साथ समूहको शिर्ष स्थानमा रहँदा पहिलो खेलमा पराजित अंक विहिनी नेपाल तेश्रो स्थानमा छ ।

साफ च्याम्पियनसिप अन्तर्गत आज नै हुने समूह ‘ए’ को अर्को खेलमा पाकिस्तान र कुवेतबिच प्रतिस्पर्धा हुनेछ । श्री कान्तेराव स्टेडियममा हुने यी दुई टोलीबिचको खेल भने दिउँसो ३:४५ बाट शुरु हुनेछ ।

प्रतियोगितामा सहभागी आठ राष्ट्रलाई दुई समूहमा विभाजन गरिएको छ । नेपाल च्याम्पियनसिपको समूह ‘ए’ मा रहेको छ । समूह ‘ए’ मा नेपालसँगै आयोजक भारत, कुवेत र पाकिस्तान रहेका छन् । समूह ‘बी’ मा लेबनान, माल्दिभ्स, भुटान र बंगलादेश रहेका छन् ।

नेपालले अब समूह चरणको तेश्रो तथा अन्तिम खेलमा असार १२ गते पाकिस्तानविरुद्ध खेल्नेछ । साफ च्याम्पियनसिपमा नेपालसँगै, भारत, कुवेत, पाकिस्तान, बंगलादेश, भुटान, माल्दिभ्स र बंगलादेश सहभागी छन् ।