अखबार नेपाल ट्रेन्डिङ

एजेन्सी: दक्षिण अमेरिकी राष्ट्र उरुग्वेले यू-२० विश्वकपको उपाधि जितेको छ । इटालीमाथि १-० को जित निकाल्दै उरुग्वेको युवा टोली यू-२० विश्वकपको उपाधि जित्न सफल भएको हो ।

अर्जेन्टिनमा आइतबार राति भएको खेलमा उरुग्वेलाई जिताउन खेलको अन्त्यतिर ८६औं मिनेटमा लुसियानो रोड्रिग्वेजले गरेको गोल नै जितका लागि निर्णायक बन्यो ।

निकै प्रतिस्पर्धात्मक र रोमाञ्चक बनेको खेलमा दुवै टोलीले गोलका केही सुवर्ण अवसर सिर्जना गरेपनि सदुपयोग गर्न नसक्दा खेलको अन्त्यतिर लुसियानोको गोल नै उरुग्वेलाई जितका लागि पर्याप्त रह्यो ।

तीनपटक फाइनल खेल्दा उरुग्वे पहिलो पटक उपाधि जित्न सफल भएको हो । यसअघि उरुग्वे १९९७ र २०१३ मा उपविजेता बनेको थियो । उरुग्वे १९९७ मा अर्जेन्टिना र २०१३ मा फ्रान्ससँग फाइनलमा पराजित भएको थियो । दक्षिण कोरियालाई ३–१ ले पराजित गर्दै इजरायल तेस्रो भएको छ ।

इटालीका सिसर कासाडेइ विश्वकपको सर्वाधिक गोलकर्ता भए । उनले कुल ७ गोल गर्न सफल भएका थिए । २० मेबाट सुरु भएको विश्वकपमा ६ महादेशका २४ राष्ट्रको सहभागिता रहेको थियो । सहभागी राष्ट्रलाई ६ समूहमा विभाजन गरी अर्जेन्टिनाको चार शहरमा खेलाइएको थियो ।