अखबार नेपाल ट्रेन्डिङ

काठमाडौं: आईसीसी विश्वकप लिग-२ अन्तर्गत पपुआन्यूगिनी (पीएनजी) विरुद्धको जारी खेलमा नेपाली टिमका ब्याटर आसिफ शेखले शतक बनाएका छन् ।

उनले १०१ बलमा शतक बनाएसँगै आसिफ नेपालको लागि एकदिवसीय क्रिकेटमा शतक बनाउने पाँचौं खेलाडी बनेका छन् ।

यसअघि नेपालको लागि पूर्वकप्तान पारस खड्का, अहिलेका कप्तान रोहित पौडेल, कुशल भुर्तेल र दिपेन्द्र सिंह ऐरीले शतक बनाइसकेका छन् ।

आजकै खेलमा आसिफले आफ्नो एकदिवसीय करिअरको १००० रन पनि पूरा गरे । यससँगै उनी एकदिवसीय क्रिकेटमा १००० रन पूरा गर्ने दोस्रो नेपाली खेलाडी बनेका छन् ।

उनीभन्दा अगाडि केही दिन पहिले मात्र कप्तान रोहित पौडेलले यही सिरिजको खेलमा किर्तिपुर मैदानमै नामिबियाविरुद्ध १००० रन पूरा गरेका थिए ।

यी २ खेलाडीपछि एकदिवसीयमा सबैभन्दा धेरै रन ज्ञानेन्द्र मल्लले बनाएका छन् । आजको खेलमा आउट भइसकेका ज्ञानेन्द्रले ८५६ रन बनाएका छन् । आजको खेलमा नेपालले टस हारेर पहिले ब्याटिङ गरिरहेको छ ।