अखबार नेपाल ट्रेन्डिङ

काठमाडौं: मंसिर ४ गतेदेखि कतारमा हुने विश्वकप फूटबल प्रतियोगिता ५०० रुपैयाँ तिरेर हेर्न पाईने भएको छ ।

विश्वकप नि:शुल्क देखाउनु पर्ने मागसहित परेको रिट सर्वोच्च अदालतले खारेज गरेपछि नेपाली टेलिभिजनले ५०० रुपैयाँ लिएर विश्वकपको प्रत्यक्ष प्रसारण गर्न पाउने भएको हो ।

न्यायाधीशद्वय प्रकाशकुमार ढुंगाना र मनोजकुमार शर्माको संयुक्त इजलासले बुधबार सर्वोच्चकै यस अघिको एकल इजलासले दिएको अल्पकालीन अन्तरिम आदेश खारेज गरेको हो ।

विश्वकप फूटबलको नेपालमा प्रसारण अधिकार पाएको मिडिया हबले हिमालय टेलिभिजनबाट प्रत्यक्ष प्रसारण गर्ने र त्यस बापत ग्राहकसँग थप ५०० रुपैयाँ शुल्क लिने निर्णय गरेको थियो ।

त्यसका विरुद्ध अधिवक्ताद्वय किशोर पौडेल र अनुपम भट्टराईले सर्वोच्च अदालतमा रिट दायर गरेका थिए । रिटमा प्रधानमन्त्री तथा मन्त्रिपरिषद्को कार्यालय, सञ्चार तथा सूचना प्रविधि मन्त्रालय, मिडिया हब, एनआईटीभी स्ट्रीम्ज, भायानेट कम्युनिकेशन्स, प्रेरा बिजनेश सेन्टर र एडप्याड एक्युजिशन, थापागाउँलाई विपक्षी बनाइएको थियो ।

निवेदकले थप ५०० रुपैयाँ लिने निर्णय कार्यान्वयन नगर्न नराउन अन्तरिम आदेश माग गरेका थिए । यसअघि कात्तिक २२ गते सर्वोच्चका न्यायाधीश प्रकाशमानसिंह राउतको एकल इजलासले अर्को निर्णय नहुँदासम्म यो निर्णय कार्यान्वयन नगर्न अल्पकालीन अन्तरिम आदेश दिएको थियो ।

त्यसमा अन्तरिम आदेश दिने कि नदिने भनेर छलफल गर्न दुवै पक्षलाई बोलाइएको थियो ।  बुधबार न्यायाधीश ढुंगाना र शर्माको निर्णयमा अन्तरिम आदेश जारी गर्न मिलेन भनिए पनि मिडिया हब र हिमाललय टेलिभिजनको सम्झौतामा कम्तिमा चारवटा खेल नि:शुल्क प्रसारित गर्नुपर्ने उल्लेख छ ।