प्रिजेन तामाङको शीघ्र स्वास्थ्य लाभको कामना
वि.सं.२०७९ मंसिर १ बिहीवार ०७:४८
काठमाडौं: पाकिस्तानविरुद्ध बुधबार दशरथ रंगशालामा मैत्रीपूर्ण खेल अघि नेपाली राष्ट्रिय फुटबल टोलीले उपचार गराइरहेका प्रिजेन तामाङको शीघ्र स्वास्थ्य लाभको कामना गरेको छ ।
उमेर समूहको च्याम्पियन टोलीको सदस्य रहेका प्रिजेन ब्लड क्यान्सको उपचार गराइरहेका छन् । पाकिस्तानसँगको खेल सुरु हुनुअघि राष्ट्रिय टोलीले गेट वेल सुन प्रिजन लेखिएको जर्सी प्रदर्शन गरेको थियो । प्रिजेनको भारतको नयाँ दिल्लीस्थित अपोलो अस्पतालमा उपचार भइरहेको छ ।
अखिल नेपाल फुटबल संघ (एन्फा) ले मंगलबार मात्र प्रिजेनलाई उपचारका लागि ३ लाख रुपैयाँ प्रदान गर्ने निर्णय गरेको थियो । एन्फा खेलाडी संघले सोमबार एन्फालाई प्रिजेनको उपचारमा सहयोग गर्न आग्रह गदै निवेदन दिएको थियो । एन्फा एकेडेमीका उत्पादन प्रिजेन तीन वर्ष अघि स्वदेशमा भएको १३ औं दक्षिण एसियाली खेलकुद (साग) र यु १८ साफ च्याम्पियनसिपको च्याम्पियन टोलीका सदस्य थिए ।
आश लाग्दा युवा खेलाडीले त्रिभुवन आर्मी फुटबल क्लबबाट ललित स्मृति यू १८ च्याम्पियनसिप जितेका थिए । फ्रेन्ड्स क्लबबाट ए डिभिजन लिग खेलेका प्रिजेन नेपाल सुपर लिग (एनएसएल) को पहिलो संस्करणको विजेता काठमाडौं रेजर्सका सदस्य थिए ।
वि.सं.२०७९ मंसिर १ बिहीवार ०७:४८