अखबार नेपाल ट्रेन्डिङ

काठमाडौं: भारतमा जारी साफ यू-२० च्याम्पियनसिप फुटबलमा नेपालले लिग चरणको अन्तिम खेलमा बंगलादेशसँग बराबरी खेल्दै अंक बाँढेको छ ।

भुवनेश्वरस्थित कालिंगा स्टेडियममा आज भएको खेलमा नेपालले बंगलादेशसँग १-१ गोलको बराबरी खेल्दै अंक बाँढेको हो  पहिलो हाफ गोलरहित बराबरीमा सकिएको थियो ।

खेलको हाफपछिको सुरुआती अग्रता बंगलादेशले बनाएको थियो । खेलको ६३औं मिनेटमा मोहमद पियास अमहेद नोभाले गोल गर्दै बंगलादेशलाई सुरुआती अग्रता दिलाएका थिए ।

नेपालका लागि लगत्तै खेलको ६८ औं मिनेटमा निरन्जन मल्लले गोल गर्दै नेपाललाई १-१ गोलको बराबरीमा ल्याए ।

निकै नै प्रतिस्पर्धात्मक र आक्रमक खेलमा दुबै टोली १० खेलाडीमा समेटिएको थियो । बंगलादेशका सहिदुल इस्लामले रातो कार्ड पाए । यस्तै नेपालका दिपेश गुरुङले रातो कार्ड पाएका छन् ।

नेपालका बेञ्चका खेलाडी रोहित सुब्बाले समेत रातो कार्ड पाएका थिए । खेलको क्रममा झगडामा उत्रिएपछि उनीहरुले रातो कार्ड पाएका हुन् ।

बराबरीसँगै नेपालले फाइनल पुग्ने सम्भावना कायम राखेको छ । नेपालले ४ खेलमा ७ अंक जोडेको छ ।  नेपाल दोस्रो स्थानमा उक्लिएको छ ।

अपराजित रहेको बंगलादेशले ४ खेलमा १० अंक जोडेर शिर्ष स्थानमा रहँदै फाइनलमा स्थान पक्का गरेको छ ।

अब नेपालले फाइनल पुग्न भारत र माल्दिभ्सबीचको खेलको नतिजा कुर्नु पर्नेछ । यदि भारतले माल्दिभ्ससँग हार ब्यहोरेमा नेपाल फाइनल पुग्नेछ ।

भारतले जित वा बराबरी गरेको खण्डमा नेपाल बाहिरिने छ । भारत र माल्दिभ्सबीचको खेल आज बेलुका ७:१५ बजे सुरु हुनेछ ।