लिग च्याम्पियन मछिन्द्रको थ्रिस्टारमाथि संघर्षपूर्ण जित, फ्रेन्ड्ससँग पराजित च्यासल रेलिगेसनमा
वि.सं.२०७८ फागुन ७ शनिवार १९:१२
काठमाडौं: जारी सहिद स्मारक ‘ए’ डिभिजन लिग फुटबलमा च्याम्पियन बनिसकेको मछिन्द्र फुटबल क्लबले थ्रिस्टामाथि संघर्षपूर्ण जित निकालेको छ ।
त्रिपुरेश्वरस्थित दशरथ रंगशालामा शनिबार भएको खेलमा मछिन्द्रले १० खेलाडीमा समेटिएको थ्री स्टार क्लबलाई १-० गोल अन्तरले पराजित गरेको हो ।
मछिन्द्रको जितमा कप्तान सुजल श्रेष्ठले पेनाल्टी मार्फत निर्णायक गोल गरे ।
थ्री स्टारका डिफेन्डर जीवन गुरुङले अविशेक गुरुङलाई पेनाल्टी क्षेत्रभित्र लडाएपछि मछिन्द्रले पेनाल्टीको अवसर पाएको हो ।
अविशेकलाई फउल गरेपछि पहेलो कार्ड पाएका जीवनले रेफ्रीसँग विवाद गरेपछि उनलाई रातो कार्ड देखाईएको थियो ।
त्यसबाहेक दुबै टोलीले अन्य गोलको अवसर गुमाएका थिए ।
जितसँगै शीर्ष स्थानको मछिन्द्रले १२ खेलमा ३२ अंक जोडेको छ ।
थ्री स्टारले १२ खेल १८ अंक जोडेको छ । थ्री स्टार चौंथो स्थानमा रहेको छ ।
यसैबीच आज भएको पहिलो खेलमा च्यासल युथ क्लब फ्रेन्ड्स क्लबसँग २-१ गोल अन्तरले पराजित हुँदै रेलिगेसनमा परेको छ ।
च्यासल एक खेल बाँकी छदै बी डिभिजनमा घटुवा भएको हो ।
फ्रेन्ड्सलाई जित दिलाउन जमौल एन्थोनी फ्रान्कोइसले दुई गोल गरे ।
च्यासलका मौसा अबगानाले एक गोल फर्काए ।
जितसँगै फ्रेन्ड्सले १२ खेलमा १० अंक जोडेको छ । फ्रेन्ड्स लिगको १२ औं स्थान रहेको छ ।
च्यासल १२ खेलमा ६ अंक जोडेर पुछारमा रहेको छ ।
वि.सं.२०७८ फागुन ७ शनिवार १९:१२