अखबार नेपाल ट्रेन्डिङ

एजेन्सी: इंग्ल्याण्डमा जारी आईसीसी एकदिवसीय विश्वकप क्रिकेटमा पाकिस्तानले पहिलो जित निकालेको छ । गएराति भएको खेलमा आयोजक इंग्ल्याण्डलाई १४ रनले पराजित गर्दै पाकिस्तानले पहिलो जित निकालेको हो ।

पाकिस्तानले दिएको ३ सय ४९ रनको फराकिलो लक्ष्य पछ्याएको इंग्ल्याण्डले ५० ओभरमा ९ विकेट गुमाएर ३ सय ३४ रन मात्र बनाउन सक्यो । इंग्ल्याण्डका जोय रुट र जोस बट्लरले शतकीय इनिङ्स खेलेपनि टोलीलाई जित दिलाउन सकेनन् । रुटले एक सय ४ बलमा १० चौका र १ छक्का सहित एक सय ७ रन बनाए । बट्लरले ७६ बलमा ९ चौका र २ छक्का सहित एक सय ३ रन जोडे ।

यस्तै जोनी ब्रैस्टोले ३३, क्रिस वोक्स २१ तथा मोइन अलीले १९ रन जोड्दा अन्य ब्याट्सम्यानले उलेख्य रन जोड्न सकेनन् । पाकिस्तानका वाहब रियाजले ३ विकेट लिए । यस्तै मोहमद आमिर र शादब खानले २/२ विकेट लिए ।

टस हारेर पहिले ब्याटिङ गरेको पाकिस्तानले ५० ओभरमा ८ विकेट गुमाएर ३ सय ४८ रन बनाएको थियो । पाकिस्तानका लागि मोहमद हाफिज, बाबर आजम र सर्फ्राज अहमेदले अर्धशतकीय इनिङ्स खेले । पाकिस्तानको उच्च स्कोरमा हाफिजले ८४, आजमले ६३ तथा कप्तान अहमेदले ५५ रन बनाए । यस्तै इमाम उल हकले ४४ तथा फकर जमानले ३६ रन जोडे ।

इंग्ल्याण्डका क्रिस वोक्स र मोइन अलीले ३/३ विकेट लिए । मार्क वुडले २ विकेट लिए । जितसंगै पाकिस्तानले एकदिवसीय क्रिकेटमा १२औं खेलमा पहिलो जित निकालेको छ । जितसंगै पाकिस्तानले २ खेलबाट २ अंक जोडेको छ । पाकिस्तान पहिलो खेलमा वेष्ट इण्डिजसंग पराजित भएको थियो ।