जापानबाट १६ लाख डोज अस्ट्राजेनेका खोप केही दिनमै नेपाल ल्याईदै
वि.सं.२०७८ साउन ७ बिहीवार १८:१०
काठमाडौं: कोरोना भाइरस विरुद्धको १६ लाख डोज अस्ट्राजेनेका खोप जापानबाट केही दिनमै नेपाल आउने भएको छ ।
नेपाल स्थित जापानी राजदूत किकुता युताकाले आज प्रधानमन्त्री शेरबहादुर देउवासँग गरेको भेटमा जापानले दिने भनेको १६ लाख डोज अस्ट्राजेनेका खोप छिट्टै आइपुग्ने बताएको प्रधानमन्त्री देउवाले समाजिक सञ्जाल ट्वीटरमार्फत जानकारी दिएका छन् ।
राजदूत युताकाले प्रधानमन्त्रीको सरकारी निवास बालुवाटार पुगेर देउवासँग आज भेट गरेका हुन् ।
जापानले कोभ्याक्स कार्यक्रम अन्तर्गत नेपाललाई कोभिड विरुद्धको अस्ट्राजेनेका खोप १६ लाख डोज दिने घोषणा केही साता अघि गरेको थियो ।
अक्सफोर्डको अस्ट्राजेनेका फर्मुलामा उत्पादन गरिएको यो खोप भारतमा सेरम इन्स्टिच्युटद्वारा उत्पादन गरिएको कोभिसिल्ड खोप जस्तै हो ।
यो खोप आएपछि पहिलो डोज कोभिसिल्ड लगाएर दोस्रो डोज लगाउन नपाएका करिब ६५ वर्षमाथिका १० लाख ज्येष्ठ नागरिकसहित १३ लाख ६५ हजार बढीले पाउनेछन् ।
वि.सं.२०७८ साउन ७ बिहीवार १८:१०