अखबार नेपाल ट्रेन्डिङ

काठमाडौं: त्रिभुवन विश्वविद्यालयको ५१औं दीक्षान्त  समारोह आज दशरथ रङ्गशालामा हुँदैछ । विश्वविद्यालयको इतिहासमा पहिलोपटक आज नोबेल पुरस्कार विजेतालाई प्रमुख अतिथि बनाएर दीक्षान्त आयोजना गर्ने लागिएको त्रिविले जनाएको छ ।

समारोहमा नोबेल पुरस्कार विजेता जापानी प्राध्यापक ताकाआकी काजिता प्रमुख अतिथिका रूपमा सहभागी हुनेछन् । टोकियो विश्वविद्यालयमा आबद्ध उनले सन् २०१५ को भौतिकशास्त्रतर्फ नोबेल पुरस्कार पाएका थिए ।

विश्वविद्यालय उपकुलपति प्रा. डा. दीपक अर्यालले दीक्षान्तका लागि सम्पूर्ण तयारी गरिएको बताए । मण्डप निर्माण,  दीक्षित विद्यार्थी र अभिभावक बस्ने कुर्सीको व्यवस्थापनलगायत सबै काम सम्पन्न भएको उनले जानकारी दिए ।

यसपटक त्रिविका १६ हजार ३०० भन्दा बढी विद्यार्थी दीक्षित हुने जनाइएको छ । दीक्षान्त समारोहमा विद्यार्थी र अभिभावकसहित ४१ हजार व्यक्ति सहभागी हुने जनाइएको छ । विश्वविद्यालयबाट स्नातक, स्नातकोत्तर, दर्शनाचार्य र विद्यावारिधि तहसमेत गरी ८९ हजार १९१ विद्यार्थी उत्तीर्ण भएका छन् । यसमध्ये १६ हजार ३८० जना विद्यार्थीले दीक्षान्त समारोहमा सहभागिताका लागि निवेदन दिएका उपकुलपति प्रा. डा. अर्यालले बताए ।

कार्यक्रममा विभिन्न सङ्काय तथा तहको परीक्षामा उत्कृष्ट नतिजा हासिल गर्ने ११ जना छात्रा  तथा १४ जना छात्रले पदकसमेत पाउने छन् । त्रिविबाट यसपटक मानविकीका १४ हजार ८५१, व्यवस्थापनबाट ४३ हजार ६१०, कानुनका दुई हजार ३३५ र शिक्षातर्फ १६ हजार ४६७ जना उत्तीर्ण भएका छन् ।

दशरथ रङ्गशालामा हुने त्रिभुवन विश्वविद्यालयको ५१औँ दीक्षान्त समारोह कार्यक्रमको ट्राफिक व्यावस्थापनका लागि विभिन्न ठाउँमा पार्किङ स्थल तोकिएको छ । काठमाडौँ उपत्यका ट्राफिक प्रहरी कार्यालयले आज ९:३० बजेदेखि ४ बजेसम्म  दशरथ रङ्गशालामा त्रिविको ५१औँ दीक्षान्त समारोह कार्यक्रम रहेको हुँदा उक्त कार्यक्रम अवधिभर आवश्यक ट्राफिक व्यावस्थापन तथा सवारी आवागमनका लागि सवारी साधनको चापलाई हेरी आवश्यकता अनुसार डाइभर्सनसमेत गरिएको जनाएको छ ।

यी हुन् पार्किङ्ग स्थलहरु :

भिभिआइपी/भिआइपीहरू पार्किङ :- दशरथ रङ्गशाला मेनगेट छेउमा ।

राष्ट्रिय खेलकुद परिषद्‍ पार्किङ :- आयोजक त्रिभुवन विश्वविद्यालयको अफिसियलका लागि मात्र ।

परराष्ट्र मन्त्रालय कन्सुलर शाखा पार्किङ्ग :- दुई पाङ्ग्रे र चारपाङ्ग्रे सवारी साधन ।

वर्ल्ड ट्रेड सेन्टर पार्किङ्ग :- दुईपाङग्रे सवारी साधनहरू ।

आर्मी हेडक्वाटर अगाडि पार्किङ्ग :- दुईपाङ्ग्रे सवारी साधनहरू ।

टुँडिखेल पार्किङ्ग :- दुईपाङ्ग्रे र चार पाङग्रे सवारी साधनहरू ।

यस्तै, काठमाडौँ उपत्यका ट्राफिक प्रहरी कार्यालयले त्रिपुरेश्वर सडकखण्ड हुँदै यात्रा गर्ने सवारी चालकहरूलाई उक्त मिति र समयमा  वैकल्पिक रुट प्रयोग गर्न आग्रह गरेको छ ।