अखबार नेपाल ट्रेन्डिङ

एजेन्सी: अमेरिकी सेनाले सुरक्षाको कारण देखाउँदै ‘टिकटक एप’ को प्रयोगमा रोक लगाएको छ । सेनाले कार्यालय प्रयोजनमा प्रयोग हुने मोबाइल फोनमा ‘टिकटक एप’ चलाउन रोक लगाएको हो । चिनियाँ कम्पनी बाइट डान्सको स्वामित्व रहेको उक्त एपलाई अमेरिकासहित विभिन्न मुलुकले कडा निगरानीमा राखेका छन् ।

अमेरिकी सेनाकी प्रवक्ता प्रमुख सेनानी रोबिन ओचोआले अमेरिकी सञ्चारमाध्यमहरूलाई उक्त एपलाई साइबर खतराका रूपमा हेरिएको बताएकी छिन् । उक्त एपको प्रयोग दिनानुदिन बढ्दै जाँदा अमेरिका लगायतका देशहरु भने शंकाको दृष्टिले हेर्दैछन् । ‘टिकटक एप’ का विश्वभरि ५० करोडको हाराहारीमा प्रयोगकर्ता छन् ।

उक्त एपले प्रायःजसो फरक किसिमका छोटा भिडिओ आफैँ सम्पादन गरेर सार्वजनिक गर्न सहयोग गर्छ । सेना प्रवक्ता ओचोआले मिलिटरी डटकमलाई बताए अनुसार सैन्य अधिकारीहरूलाई सरकारी स्वामित्वमा रहेका मोबाइल फोनहरूमा डिसेम्बर महिनाको तेस्रो हप्ताबाट एप प्रयोग नगर्न सुझाइएको बीबीसीले उल्लेख गरेको छ ।