अखबार नेपाल ट्रेन्डिङ

काठमाडौं: देशैभर उच्च गतिको ब्रोडब्याण्ड इन्टरनेट पुर्‍याउने लक्ष्यसहित नेपाल दूरसञ्चार प्राधिकरणले असार मसान्तसम्म ६ सय ६३ स्थानीय तहमा इन्टरनेट जडान गरेको छ ।

प्राधिकरणले ग्रामीण दूरसञ्चार विकास कोषको आर्थिक सहयोगमा उक्त सेवा उपलब्ध गराउन सम्बन्धित परियोजनालाई १८ वटा प्याकेज बनाएर सञ्चालन गर्दै आएको हो ।

उक्त प्याजेक अन्तर्गत असार मसान्तसम्ममा ९४ दशमलव ४४ प्रतिशत स्थानमा उच्च गतिको इन्टरनेट जडान भइसकेको छ ।

१८ प्याकेजमध्ये १५ प्याकेज अन्तर्गत ६० जिल्लाका तोकिएका स्थानमा सय प्रतिशत तथा दुई प्याकेज अन्तर्गत १० जिल्लामा ५० प्रतिशतभन्दा बढी स्थानमा इन्टरनेट जडान गरिएको छ ।

१८ वटा प्याकेजका १५ हजार ९ सय ८२ स्थानमध्ये हालसम्म १४ हजार २ सय १८ स्थानमा इन्टरनेट जडान भइसकेको छ भने एक हजार ७ सय ६४ स्थानमा इन्टरनेट जडान गर्न बाँकी छ ।

७ सय २ स्थानीय निकायमध्ये असार मसान्तसम्म ६ सय ६३ स्थानमा इन्टरनेट जडान भइसकेको र ३९ स्थानीय तहमा जडान भइरहेको छ ।

यसैगरी ५ हजार ९ सय ३३ वडा कार्यालयमध्ये हालसम्म पाँच हजार २ सय ६४ स्थान, ५ हजार २ सय २५ माध्यमिक विद्यालयमध्ये ४ हजार ६ सय ४० विद्यालय र ४ हजार १ सय २२ स्वास्थ्य संस्थामध्ये ३ हजार ६ सय ५१ संस्थामा इन्टरनेट जडान भइसकेको छ ।

सम्पन्न भइसकेका परियोजनामध्ये हालसम्म छ वटा परियोजनाको अनुगमन तथा प्रमाणीकरण भइसकेको, दुई परियोजनाको प्राधिकणबाट नियुक्त परामर्शदाताबाट पहिलो चरण अन्तर्गतको अनुगमन तथा प्रमाणीकरण भइरहेको र दुई परियोजनाको दोस्रोचरण अन्तर्गतको अनुगमन तथा प्रमाणीकरण भइरहेको छ ।