अखबार नेपाल ट्रेन्डिङ

काठमाडौं: प्रमुख प्रतिपक्षी दल नेपाली कांग्रेसले अवरोध गरिरहेको प्रतिनिधिसभा बैठक आज बस्दैछ । अख्तियार दुरुपयोग अनुसन्धान आयोगले आफ्ना नेताविरुद्ध भ्रष्टाचार मुद्दा दायर गरेको विरोधमा प्रमुख प्रतिपक्षी दलले अवरोध गरिरहँदा सभामुख अग्‍निप्रसाद सापकोटाले आज पनि प्रतिनिधिसभा बैठक बोलाउनुभएको हो ।

आजको बैठकमा विभिन्न विधेयकहरु पेश गर्ने कार्यसूची तोकिएको संघीय संसदले जनाएको छ । आज प्रतिनिधिसभा बैठक बसेमा गृहमन्त्री रामबहादुर थापाले ‘कारागार विधेयक, २०७६’ पेश गर्ने कार्यसूची छ । प्रधानमन्त्रीका तर्फबाट ‘संघ, प्रदेश र स्थानीय तह अन्तरसम्बन्ध व्यवस्था विधेयक’ र भौतिक पूर्वाधार तथा यातायातमन्त्री वसन्त कुमार नेम्बाङले राष्ट्रिय सभामा ‘नेपाल इन्जिनियरिङ परिषद्, पहिलो संशोधन’ विधेयक छलफलका लागि पेश गर्ने सम्भावित कार्यसूची छ ।

प्रमुख प्रतिपक्षी दल कांग्रेसले राजनीतिक प्रतिशोधका आधारमा आफ्नो पार्टीका नेतालाई भ्रष्टाचारको मुद्दा लगाइएको र नेकपाका नेताहरुलाई जोगाउने काम गरेको भन्दै बिहीबार र शुक्रबारको संसद बैठक अवरोध गरेको थियो । बालुवाटारस्थित ललितानिवास जग्गा अनियमितता प्रकरणमा तत्कालीन उपप्रधानमन्त्री एवम् कांग्रेस उपसभापति विजय कुमार गच्छदारविरुद्ध अख्तियारले मुद्दा दर्ता गरेको छ ।