अखबार नेपाल ट्रेन्डिङ

काठमाडौं: सत्तारुढ नेपाल कम्युनिस्ट पार्टी (नेकपा)ले अग्नि सापकोटालाई सभामुखको उम्मेदवार बनाउने निर्णय गरेको छ । आइतबार बसेको नेकपा सचिवालयको बैठकले यो निर्णय गरेको हो । त्यसअघि आइतबार विहान प्रधानमन्त्री एवं अध्यक्ष केपी शर्मा ओली र अर्का अध्यक्ष पुष्पकमल दाहालबीच सापकोटालाई सभामुख बनाउने सहमति भएको थियो ।

झण्डै एकमहिना लामो आन्तरिक किचलो र उल्झनकाबीच पार्टीका स्थायी कमिटि सदस्य समेत रहेका सापकोटालाई नेकपाले सभामुख बनाउने निर्णय गरेको हो । अध्यक्ष पुष्पकमल दाहालका विश्वासपात्र मानिन्छ । अर्का अध्यक्ष केपी शर्मा ओलीले सुवासचन्द्र नेम्वाङलाई बनाउनुपर्ने अडान लिएपनि शक्ति सन्तुलनका लागि पूर्व माओवादीबाट सभामुख बनाइनुपर्ने अध्यक्ष दाहालको अडान थियो । ओली र दाहालको यहि अडाका कारण एक महिनासम्म नेकपा भित्र सभामुखको विषय किचलोको रुपमा बन्दै आएको थियो ।

नेकपा अनिर्णयको बन्दी बन्दा संसद बैठक नै ३ पटक स्थगित भयो । दाहाललाई गलाउने रणनीतिका साथ सभामुखको अडान कसेका ओली अन्तत आफै गले र दाहालले अघि सारेका अग्नी सापकोटा अवको सभामुख बन्ने निश्चित भएको छ । सभामुखको टुंगो लागेपछि मात्र राजीनामा दिने बताउदै आएकी उपसभामुख शिभमाया तुम्वाहाम्फेले सोमवार बैठक बस्नुअघि राजीनामा दिनेछिन् भने बैठक संसदका जेष्ठ सदस्य राजपा नेता महन्त ठाकुरको अध्यक्षतामा शुरु हुने छ ।