अखबार नेपाल ट्रेन्डिङ

काठमाडौं: राष्ट्रिय स्वतन्त्र पार्टी (रास्वपा) बाट झापा क्षेत्र नम्बर-५ का प्रतिनिधि सभा सदस्य उम्मेदवार वालेन्द्र शाहले आफ्नो चुनावी वाचा पत्र सार्वजनिक गरेका छन् । झापा क्षेत्र नम्बर ५ का समस्या र एजेण्डा समेटेर बाचा पत्र सार्वजनिक गरेका हुन् । उनले बेथिति र भ्रष्टाचार विरुद्ध संसदमा सशक्तरूपमा उभिने मुख्य संकल्पका साथ शाहले शिक्षा, स्वास्थ्य, कृषि र पूर्वाधार विकासलाई प्रमुख प्राथमिकतामा राखेका छन् । वाचा पत्रमा राजनीतिलाई पेसा नबनाउने दाबी गरेका छन ।

बाचा पत्रमा भनिएको छ-, ‘राजनितीलाई सेवा बनाउनेछु र जनताको विश्वासलाई काममा रूपान्तरण गर्नेछु । भ्रष्टाचार विरुद्ध शून्य सहनशीलता र सार्वजनिक सेवालाई चुस्त दुरुस्त बनाउने प्रयत्न गर्ने छु ।’ उनले विद्यालय छोड्ने दर शून्यमा झार्ने र सामुदायिक विद्यालयमा ‘स्मार्ट क्लास’ तथा प्रयोगशाला स्थापना गर्ने बताएका छन । यस्तै, स्वास्थ्य क्षेत्रमा विपन्न परिवारका लागि नि:शुल्क उपचारको ग्यारेन्टी, दमक अस्पताललाई ३०० बेडमा स्तरोन्नति गर्ने र घर-घर स्वास्थ्य सेवा कार्यक्रमझ मार्फत ज्येष्ठ नागरिकको स्वास्थ्य जाँच गर्ने प्रतिबद्वता जनाएका छन । बाचा पत्रमा झापा-५ को मुख्य आधार कृषिलाई आधुनिकीकरण बताएका छन ।

बाचा पत्रमा भनिएको छ, ‘कन्काई-रतुवा सिँचाइ योजना’ विस्तार र ‘एक पालिका, एक शीत भण्डार’ को अवधारणा ल्याइएको छ। यस्तै, पूर्वाधारतर्फ दमक-रवि-चिसापानी सडकको पूर्णता, हुलाकी सडक र पुलहरूको समयमै निर्माण, दमकलाई ‘स्मार्ट सिटी’ का रूपमा विकास गर्न आवश्यक पूर्वाधार निर्माण गरिन्छ ।’ उनले भूमिहीन र सुकुम्वासी समस्या समाधानका लागि कानुन निर्माण गर्ने र व्यवस्थित बसोबासको ग्यारेन्टी गर्ने बताएका छन । शाहले ‘जनअपेक्षा अनुरूपको काम गर्न आएको हुँ, काम गर्न दिनुहोला’ भन्दै मतदातासँग अपिल गरेका छन् ।

पार्टीको केन्द्रीय लाइन प्रदेश संरचनालाई नगन्ने खालको छ, तर उम्मेद्वार शाहले भने सोही संरचनालाई अधिकार प्रत्यायोजन गर्ने बाचा गरेर मतदातामा आफू सङ्घीयताको पक्षधर भएको स्पष्ट पार्न खोजेका छन् । यसअघि उनले प्रदेशको सांसद र मन्त्रीहरूका कारण खर्च बढेको छ भन्ने मतदाताको प्रश्नको उत्तर दिँदै त्यो खर्च सानो अंश मात्रै भएको बताएका थिए । सुकुम्वासी समस्या समाधानका लागि केन्द्रले नीतिगत र कानुनी सुधारको कुरा गरेको छ । तर, उम्मेदवार शाहले भने १ हजार दिनमा समस्या सल्टाउने दाबी गरेका छन् । उनलाई यसअघि सुकुम्वासी बस्तीमा डोजर चलाउने व्यक्तिको रूपमा विपक्षीहरूले चित्रित गरिरहेका थिए । त्यही सन्दर्भमा उनले सुकुम्वासी समस्या १ हजार दिनमा सल्टाउने वाचा गरेका हुन् ।

‘झापा–५ का भूमिहीन, सुकुम्वासी तथा अव्यवस्थित बसोबासको समस्यालाई न्यायोचित र दिगो समाधान गर्न… १०० दिनमा आयोग, १००० दिनमा समाधान नीति अवलम्बन गरी अधिकार सम्पन्न आयोग मार्फत सुकुम्वासी समस्या समाधान गरिनेछ,’ बालेनको घोषणपत्रमा उल्लेख छ । केन्द्रीय वाचापत्रमा भने यस्तो कुनै समयसीमा तोकिएको छैन ।

रास्वपाको केन्द्रीय वाचापत्रले ५ वर्षमा मुलुकलाई रेमिट्यान्स मुक्त बनाउने लक्ष्य राखेको छ । ‘आगामी पाँच वर्षभित्र नेपाललाई रेमिट्यान्सको मात्र भर पर्ने परनिर्भरताबाट मुक्त गरी उत्पादन र निर्यात–उन्मुख अर्थतन्त्रतर्फ मोडिनेछ,’ केन्द्रको वाचापत्रमा उल्लेख छ । तर, बालेनले वैदेशिक रोजगारीलाई एउटा निरन्तर प्रक्रियाको रूपमा स्विकार्दै पर्यटन र उद्योग खण्डमा अर्कै कुरा गरेका छन् । ‘वैदेशिक रोजगारीबाट फर्केकाहरूका लागि उद्यम प्रवर्धन कार्यक्रम सञ्चालन गरिनेछ,’ बालेनले भनेका छन् । केन्द्रले लोकप्रियताका लागि रेमिट्यान्स मुक्तको कुरा गरे पनि बालेनले त्यसलाई असम्भव ठानेको बुझिन्छ ।

केन्द्रीय वाचापत्रले कक्षा १२ सम्मको शिक्षालाई पूर्ण निःशुल्क र राष्ट्रिय शिक्षा नीतिमा जोड दिएको छ । तर, बालेनले भने आफ्नो क्षेत्रमा काठमाडौँ महानगरपालिकाले आफ्नो पालामा सञ्चालन गरेको कार्यक्रमलाई सापट लिएका छन् । ‘काठमाडौँ महानगरमा लागू गर्दै आएको शिक्षामा सीप कार्यक्रम कार्यान्वयन गरी विद्यार्थीहरूको विदेश जानुपर्ने बाध्यतालाई न्यूनीकरण गरिनेछ,’ बालेनको वाचापत्रमा उल्लेख छ । केन्द्रले देशभर एउटै नेशनल करिकुलमको कुरा गर्दा स्थानीय उम्मेदवारले एउटा विशेष नगरको मोडेललाई झापामा लागू गर्ने कुरा गर्नुले नीतिगत एकरूपतामा भने कमी देखाउन सक्छ ।